اسلام آباد، وزیراعظم کے معاون خصوصی برائے سی ڈی اے امورعلی نواز اعوان نے کہا ہے کہ اسلام آباد میں بلدیاتی انتخابات جلد ہوں گے اور نیا سیٹ اپ انتظامی اور مالی لحاظ سے انتہائی موثر اور طاقتور ہوگا۔
صدر مملکت عارف علوی کی طرف سے اسلام آباد لوکل گورنمنٹ آرڈیننس کے اجرا کے بعد اظہار خیال کرتے ہوئے انہوں نے کہا کہ لوکل گورنمنٹ ایکٹ 2021 ایک جامع دستاویز ہے، جس میں مقامی حکومت کے اختیارات، فنڈز اور دائرہ اختیار سمیت تمام مسائل کا احاطہ کیا گیا ہے۔انہوں نے کہا کہ اسلام آباد کیپیٹل ٹیریٹری لوکل گورنمنٹ آرڈیننس 2021 کے تحت، مقامی حکومت کے نمائندے تعلیم اور صحت کے شعبوں میں بھی اپنی آرا دے سکیں گے معاونِ خصوصی وزیراعظم پاکستان علی نواز اعوان نے کہا کہ 2018 کے عام انتخابات میں پاکستان تحریک انصاف نے اسلام آباد سے ایم این اے کی تینوں نشستیں جیتیں جس کی ایک بڑی وجہ پی ٹی آئی کی طرف سے مقامی حکومتوں میں بہترین کارکردگی تھی 2018 کے انتخابات میں 3 میں سے 2 ایم این ایز مقامی حکومتوں سے سامنے آئیانہوں نے کہا کہ انتخابی مہم میں، ہم نے عوام سے وعدہ کیا تھا کہ ان کے مسائل کو ان کی دہلیز پر حل کرنے کے لیے ایک طاقتور مقامی حکومت متعارف کرائی جائے گی اور اب ہم قانونی تقاضے پورے کرنے کے بعد بہت جلد بلدیاتی انتخابات کرانے جا رہے ہیں، اس ایکٹ کے تحت میئر کا انتخاب براہ راست کیا جائے گا اور تقریبا 100 نیبر ہڈ کونسلیں ہوں گی جن میں سے ہر ایک میں 20,000 افراد شامل ہوں گے۔وزیر اعظم کے معاون نے کہا کہ وزیر منصوبہ بندی اسد عمر کے تعاون اور رہنمائی کے بغیر یہ ایکٹ کابینہ سے تیار اور پاس نہیں کیا جا سکتا تھا۔ انہوں نے کہا کہ اسلام آباد کے بلدیاتی انتخابات الیکٹرانک ووٹنگ مشین کے ذریعے ہوں گے جن میں بیرون ملک اسلام آباد کے شہری بھی حق رائے دہی استعمال کر سکیں گے۔
