اسلام آباد(نیوزڈیسک)اسلام آبادچیمبرزاینڈ کامرس انڈسٹری کے صدر احسن ظفر بختاوری نے ورلڈ بینک کے خدشات کے حوالے سے اپنے ایک بیان میں کہا کہ تمام سیاسی جماعتیں اپنے انتخابی منشور میں پالیسیوں کا تسلسل یقینی بنائیں، ملکی معاشی بحالی کا سفر پائیدار اور جامع پالیسیوں میں پوشیدہ ہے، سرمایہ کاری کیلئے اٹھائے گئے اقدامات کی وجہ سے معیشت بحال ہو رہی ہے ۔
احسن بختاوری نے کہا کہ صنعتوں کے فروغ اورکاروبار دوست ماحول کیلئے پالیسیوں کا تسلسل ضروری ہے، مقامی صنعت کے فروغ کیلئے سمگلنگ کے خلاف حکومتی اقدامات جاری رہنے چائیں، بڑی سیاسی جماعتیں اپنے منشور میں انڈسٹری پر عائد ٹیکسوں ،توانائی قیمتوں میں کمی جیسے اقدامات تجویز کریں، سالانہ اربوں روپے کے خسارے کا شکار اداروں کی نجکاری کا عمل مزید تیز کیا جائے ، صدر آئی سی سی آئی نے کہا کہ پاکستان میں آئندہ 10سالوں میں 50بلین ڈالر سے زائد کی سرمایہ کاری کی توقعات ہیں، ملک میں بیرونی سرمایہ کاری لانے کیلئے ضروری ہے کہ انویسٹرز کا اعتماد بحال کیا جائے ۔
