بیجنگ : جارجیا کی پارلیمنٹ کے اسپیکر شالوا پاپواشویلی نے اپنے پہلے دورۂ چین کے دوران چائنا میڈیا گروپ کو دیے گئے خصوصی انٹرویو میں کہا کہ دنیا کے بہت سے ممالک کے لیے چین قومی تبدیلی اور ترقی کا ایک مثالی نمونہ ہے، خواہ بات سیاسی ترقی کی ہو، اقتصادی ترقی کی یا سماجی ترقی کی۔
انہوں نے کہا کہ چین مستقبل کے لیے طویل المدتی منصوبہ بندی کا ایک جامع نظام اپناتا ہے، جس کے تحت مختلف مراحل کے اہداف اور متوقع نتائج واضح طور پر متعین کیے جاتے ہیں۔ یہی طرزِ حکمتِ عملی چین کی اقتصادی ترقی میں غیر معمولی پیش رفت کا اہم سبب بنی ہے۔ انہوں نے مزید کہا کہ جارجیا بیلٹ اینڈ روڈ انیشی ایٹو کی بھرپور حمایت کرتا ہے اور مستقبل میں جارجیا میں لاجسٹک بنیادی ڈھانچے کی تعمیر کے شعبے میں چین کے ساتھ مزید گہرے تبادلوں اور تعاون کا خواہاں ہے۔اس تعاون سے نہ صرف جارجیا اور چین بلکہ "مڈل کوریڈور” اور بحیرۂ کیسپین کے پار بین الاقوامی نقل و حمل راہداری استعمال کرنے والے تمام فریقوں کو فائدہ پہنچے گا۔ اس انیشی ایٹو میں شمولیت تمام شریک ممالک کے لیے باہمی فائدے اور مشترکہ کامیابی کا باعث ہے۔شویلی نے بین الاقوامی سطح پر چین کے کردار کو بھی سراہتے ہوئے کہا کہ چین نے یہ ثابت کیا ہے کہ پُرامن پالیسی اختیار کر کے نہ صرف عالمی احترام حاصل کیا جا سکتا ہے بلکہ اپنے ساتھ ساتھ پڑوسی خطوں اور پوری دنیا کی ترقی میں بھی مثبت کردار ادا کیا جا سکتا ہے۔انہیں یقین ہے کہ چین کی پُرامن پالیسی کو مستقبل میں عالمی برادری کی جانب سے مزید احترام اور پذیرائی حاصل ہوگی۔
