اسلام آباد(آئی پی ایس)الیکشن کمیشن کے فیصلے کے خلاف پٹیشن تیار، چیئرمین پی ٹی آئی عمران خان عمران خان نے قانونی ماہرین کا اجلاس طلب کرلیا ہے۔
تفصیلات کے مطابق الیکشن کمیشن کے فیصلے کے خلاف پٹیشن تیار کر لی گئی ہے جس کے بعد اب چیئرمین پی ٹی آئی عمران خان نے قانونی ماہرین کا اجلاس طلب کرلیا ہے۔
اجلاس میں الیکشن کمیشن کے فیصلے پر عمران خان کو بریف کیا جائے گا اور عمران خان سے حتمی منظوری کے بعد پیٹیشن جمع کروائی جائے گی۔
واضح رہے کہ الیکشن کمیشن آف پاکستان کی جانب سے توشہ خانہ ریفرنس میں عمران خان کو نااہل قرار دے دیا گیا ہے۔
الیکشن کمیشن آف پاکستان میں چیف الیکشن کمشنر سکندر سلطان راجہ کی سربراہی میں 4 رکنی بینچ نے توشہ خانہ کیس کا فیصلہ پڑھ کر سنایا۔
فیصلے کے مطابق الیکشن کمیشن نے عمران خان کو نا اہل قرار دیتے ہوئے الیکشن کمیشن نے عمران خان کی قومی اسمبلی کی رکنیت ختم کردی ہے۔
فیصلے میں بتایا گیا ہے کہ عمران خان حالیہ ضمنی انتخابات میں جیتی 6 نشستوں پر بھی حلف نہیں اٹھا سکتے ہیں۔
الیکشن کمیشن نے بتایا کہ عمران خان نے الیکشن کمیشن میں غلط بیان حلفی جمع کرایا اور دانستہ طور پر الیکشن کمیشن سے غلط بیانی کی تاہم عمران خان کے خلاف کرپٹ پریکٹسز کی کارروائی شروع کرنے کا فیصلہ کیا ہے۔
فیصلے میں بتایا گیا ہے کہ عمران خان نے توشہ خانہ سے وصول تحائف سالانہ گوشواروں میں ظاہر نہیں کیے اور توشہ خانہ تحائف ظاہر نہ کرنا عمران خان کی بدنیتی ثابت کرتا ہے۔
الیکشن کمیشن نے الیکشن کمیشن سیکریٹریٹ کو عمران خان کے خلاف کارروائی شروع کرنے کی ہدایت جاری کردی ہے جبکہ آج ہی عمران خان کی قومی اسمبلی کی رکنیت ختم کرنے کا نوٹیفکیشن جاری کرنے کا حکم بھی دے دیا گیا ہے۔
خیال رہے کہ الیکشن کمیشن نے عمران خان کو تاحیات نا اہل نہیں کیا ہے۔
