نیب راولپنڈی سب آفس جی بی نے سکردو میں پبلک سکول اینڈ کالج کے اشتراک سے سیمینار کے ساتھ ایک پینٹنگ اور مضمون نویسی مقابلہ منعقد کیا۔ تقریب کا موضوع ”کرپشن سے پاک پاکستان – ایک خواب، ایک مشن” تھا۔سیمینار میں مختلف شعبہ ہائے زندگی کے مختلف معززین نے شرکت کی جن میں لیفٹیننٹ کرنل فیصل رحمان، پرنسپل پبلک سکول اینڈ کالج سکردو اور سکول و کالج کے طلبا کی کثیر تعداد شامل تھی۔ اس موقع پر ڈائریکٹر نیب جی بی جناب ناصر جونیجو نے بطور مہمان خصوصی شرکت کی۔تقریب کا آغاز ابتدائی طور پر 70 سے زائد طلبا کے درمیان مصوری کے مقابلہ کے انعقاد سے ہوا جس میں پاکستان میں بدعنوانی کے نقصان دہ اثرات کے ساتھ ساتھ ملک سے اس کے سدباب اور ختم کرنے کے مختلف طریقے دکھائے گئے۔مصوری کے مقابلے کے بعد 20 طلبا کے درمیان مضمون نویسی کا مقابلہ ہوا جس میں کالج کے طلبا نے ملک کے اندر بدعنوانی کے مختلف طریقوں اور ذرائع کے بارے میں اپنے خیالات کو انتہائی واضح انداز میں اجاگر کیا۔تقریب کا اختتام ایک سیمینار کے ساتھ ہوا جس میں مختلف مقررین نے اس طرح کی سرگرمیوں کی اہمیت کے حوالے سے اپنے خیالات کا اظہار کیا تاکہ نوجوان نسل کو بدعنوانی کی سماجی لعنت سے آگاہ کیا جا سکے۔ لیفٹیننٹ کرنل فیصل رحمان نے اجتماع سے خطاب کرتے ہوئے ابتدائی طور پر نیب گلگت کا شکریہ ادا کیا کہ نوجوانوں کو ان کے فرائض سے روشناس کرانے کے لیے ایک انتہائی ضروری سرگرمی کا اہتمام کیا اور پھر نوجوانوں پر زور دیا کہ وہ ملک کی افزودگی اور خوشحالی کے لیے فعال کردار ادا کریں۔محترم ناصر جونیجو نے اجتماع سے خطاب کرتے ہوئے پبلک سکول و کالج کی انتظامیہ کا شکریہ ادا کیا کہ انہوں نے نیب کے آپریشنل طریقہ کار کے آگاہی نظام کے تحت تقریب کے انعقاد میں بھرپور تعاون کیا۔ اس کے بعد انہوں نے سامعین کو متوجہ کیا کہ بدعنوانی عام معاشرتی تصور کے مطابق نہ صرف رشوت کا تبادلہ ہے، بلکہ یہ مختلف صورتوں میں ظاہر ہوتی ہے اور معاشرے کے لیے نقصان دہ خطرات کا باعث بنتی ہے اس لیے اس خطرے کو ہر سطح پر روکنا چاہیے۔ ہمارے معاشرے میں ایک سرکاری ملازم اپنی ڈیوٹی تندہی سے نہ کر کے کرپشن کر سکتا ہے۔ تاہم پرائیویٹ سیکٹر سے تعلق رکھنے والے لوگ جن میں دودھ اور پھل فروش بھی شامل ہیں اپنے صارفین کو دھوکہ دیتے ہیں تو وہ بھی کرپشن کرتے ہیں۔
