شہریوں کی شکایات پر وزیراعظم عمران خان کا بڑا فیصلہ سامنے آیا اور انہوں نے متعلقہ اداروں کو گزشتہ برس کی حل شدہ 15 لاکھ شکایات میں سے 2 لاکھ 38 ہزار شکایات کو دوبارہ کھولنے کا حکم دیدیا ۔
وزیراعظم نے ہدایت کی ہے کہ شکایات کو نظرثانی کے لئے مجاز افسران کے حوالے کیا جائے۔ صوبائی سطح پر نظر ثانی کی نگرانی متعلقہ چیف سیکریٹری و آئی جی کریں جبکہ وفاقی سطح پر اس کی ذمہ داری متعلقہ وزارت کے پاس ہوگی ۔ وزیراعظم ہاؤ کے مطابق وفاقی اداروں کی کل ایک لاکھ 7 ہزار شکایات دوبارہ کھولی جائیں گی جبکہ صوبائی سطح میں 80 ہزار حکومت پنجاب ،27 ہزار خیبرپختونخوا ، 15 ہزار سندھ ، 3 ہزار بلوچستان ، 11 سو آزاد کشمیر اور 400 گلگت بلتستان کے ماتحت اداروں سے متعلق ہیں ان میں سے بیشتر شکایات بلدیاتی خدمات، بجلی گیس ، مواصلات اور تعلیم سے متعلق ہیں۔ ایوان وزیراعظم نے ہدایت کی ہے کہ شکایات پر نظر ثانی کرکے متعلقہ اعلی افسران رپورٹ جمع کرائیں ۔
