سکھر (آئی پی ایس )سکھرکی احتساب عدالت نے آمدن سے زائد اثاثہ جات کیس میں خورشید شاہ کے بیٹے فرخ شاہ کی ضمانت منظورکرلی۔ احتساب عدالت نے پیپلز پارٹی کے ممبر صوبائی اسمبلی فرخ شاہ کی ایک کروڑ روپے کے عوض درخواست ضمانت منظورکی۔ خیال رہیکہ آمدن سے زائد اثاثہ جات کیس میں ایم پی اے فرخ شاہ 5 ماہ سے گرفتار اور جیل میں ہیں۔ پاکستان پیپلز پارٹی کے چیئر مین بلاول بھٹو زرداری کا کہنا ہے کہ نیب گردی سمیت سلیکٹڈ حکمرانوں سے تمام مظالم کا حساب آئندہ عام انتخابات میں لیں گے جو اب زیادہ دور نہیں۔ پاکستان پیپلز پارٹی کے چیئر مین نے پارٹی کے سینئر رہنما سید خورشید شاہ کے صاحبزادے و ایم پی اے فرخ شاہ کو ضمانت کی منظوری پر مبارکباد دیتے ہوئے کہا کہ ظلم کی زنجیریں ٹوٹ رہی ہیں، نیب گردی کا خاتمہ نوشتہ دیوار ہے۔ انہوں نے کہا کہ فرخ شاہ کو نیب کے جھوٹے مقدمے میں ضمانت ملی ہے، کل ایسے تمام جھوٹے مقدمات کا خاتمہ ناگزیر ہے، خورشید شاہ اور ان کے اہلخانہ کو نیازی حکومت نے سیاسی انتقام کا نشانہ بنایا، نیب گردی سمیت سلیکٹڈ حکمرانوں سے تمام مظالم کا حساب آئندہ عام انتخابات میں لیں گے جو اب زیادہ دور نہیں۔
