برطانوی وزیرِ اعظم اینڈی برنم نے برطانیہ میں خانہ بدوشی (سڑکوں پر سونے والے افراد) کے خاتمے کو اپنی حکومت کا ایک اہم مشن قرار دیتے ہوئے اعلان کیا ہے کہ کرسمس سے قبل زیادہ سے زیادہ بےگھر افراد کو سڑکوں سے منتقل کر کے ہنگامی اور محفوظ رہائش فراہم کی جائے گی۔
انہوں نے کہا کہ کسی بھی شخص کو سڑک، ریلوے اسٹیشن یا کسی دوسری عوامی جگہ پر رات گزارنے پر مجبور نہیں ہونا چاہیے، حکومت اس مقصد کے لیے مقامی کونسلوں، میئرز اور فلاحی اداروں کے ساتھ مل کر کام کرے گی تاکہ نہ صرف بےگھر افراد کو فوری پناہ فراہم کی جا سکے بلکہ بےگھری کی بنیادی وجوہات کا بھی مؤثر حل نکالا جا سکے۔
وزیراعظم نے یاد دلایا کہ کوویڈ-19 کی وبا کے دوران حکومت نے کامیابی کے ساتھ ہزاروں افراد کو سڑکوں سے محفوظ رہائش گاہوں میں منتقل کیا تھا، اس لیے اگر اس وقت یہ کام ممکن تھا تو اب بھی اسے دوبارہ انجام دیا جا سکتا ہے۔
حکومت نے اس منصوبے کے لیے مجموعی طور پر 442 ملین پاؤنڈ مختص کیے ہیں، جنہیں ہنگامی رہائش، معاون خدمات اور بےگھر افراد کی مستقل بحالی کے اقدامات پر خرچ کیا جائے گا۔
سرکاری اعداد و شمار کے مطابق 2025 میں صرف انگلینڈ میں 4,793 افراد سڑکوں پر سوتے ہوئے شمار کیے گئے، جو گزشتہ سال کے مقابلے میں 3 فیصد زیادہ ہیں اور اب تک کی ریکارڈ بلند ترین تعداد ہے۔
حکومت کا کہنا ہے کہ ان اعداد و شمار سے ظاہر ہوتا ہے کہ بےگھر ہونے کے مسئلے سے نمٹنے کے لیے فوری اور مؤثر اقدامات ناگزیر ہو چکے ہیں۔
