فتح جنگ:پرائس کنٹرول مجسٹریٹ و تحصیلدار فتح جنگ چوھدری شفقت محمود جنہیں ٹریفک مجسٹریٹ کے اختیارات بھی حاصل ہیں کی زیرِ نگرانی رات کے اوقات میں فل لائٹس اور غیر قانونی اضافی لائٹس استعمال کرنے والی چھ بھوسے والے ٹرکوں کے خلاف سخت اور بلاامتیاز کارروائی کی گئی، اضافی غیر قانونی لائٹس قبضے میں لے لی گئیں جس کا مقصد ٹریفک قوانین کی کھلی خلاف ورزیوں کا خاتمہ اور شہریوں کی جان و مال کا تحفظ ہے۔
کارروائی کے دوران ایک سیمنٹ سے لوڈ ٹرک بھی تحویل میں لے کر ڈرائیور کو گرفتار کیا گیا جبکہ دو ٹرالے بھی بند کیے گئے، مجموعی طور پر چھ ٹرکوں اور 22 ویلرز کے خلاف قانون کے مطابق کارروائی عمل میں لائی گئی۔ اس موقع پر چوھدری شفقت محمود نے سخت الفاظ میں واضح کیا کہ فل لائٹس اور ایکسٹرا لائٹس استعمال کرنے والوں کے ساتھ کسی قسم کی نرمی نہیں برتی جائے گی اور سفارش یا دباؤ ڈالنے والوں کے خلاف مزید سخت ایکشن لیا جائے گا۔ انہوں نے خبردار کیا کہ عوام کی جانوں سے کھیلنے والوں کو کسی صورت معاف نہیں کیا جائے گا، یہ آپریشن روزانہ کی بنیاد پر بالخصوص رات کے وقت جاری رہے گا، کسی اہلکار کی غفلت ناقابلِ برداشت ہوگی اور ٹریفک قوانین کی خلاف ورزی پر زیرو ٹالرنس پالیسی کے تحت کارروائی یقینی بنائی جائے گی۔
