اسلام آباد:ایف پی سی سی آئی اور سمیڈا کے زیر اہتمام انٹرنیشنل ویمن انٹرپنیورشپ ڈے کی تقریب کا انعقاد کیا گیا،
تقریب میں وزیراعظم کے معاون خصوصی برائے صنعت ہارون اختر خان، صدر ایف پی سی سی آئی عاطف اکرام شیخ، سمیڈا حکام نے شرکت کی ،
تقریب میں نائب صدر ایف پی سی سی آئی قراۃ العین، طارق جدون، چئیرمین کیپٹل آفس کریم عزیز ملک، چئیرمین کوآرڈینیشن و صدر حافظ آباد چیمبر ملک سہیل حسین و دیگر نے شرکت کی ۔
صدر ایف پی سی سی آئی عاطف اکرام شیخ نے تقریب سے خطاب کرتے ہوئے کہا کہ خواتین صرف معاشی منظرنامے میں شریک نہیں بلکہ وہ انوویشن اور پائیدار ترقی کے پیچھے محرک قوت ہیں، ہارون اختر خان کا ویژن اور سپورٹ ایس ایم ایز اور بزنس سیکٹر میں خواتین کو بااختیار بننے کیلئے حوصلہ دیتا ہے، خواتین کو بااختیار بنانے کے حوالے سے نائب صدر قراۃ العین کی خدمات کو خراج تحسین پیش کرتے ہیں، پاکستان اپنی نصف آبادی کو پیچھے چھوڑ کر ترقی نہیں کر سکتا،
صدر ایف پی سی سی آئی نے کہا کہ ہماری معیشت کا مستقبل اور پائیدار ترقی خواتین کی متحرک شرکت پر منحصر ہے، آج خواتین کی زیر قیادت کاروبار صنعتوں کو تبدیل کر رہا ہے، چیلنجز کے باوجود پاکستان میں کاروباری خواتین رکاوٹوں کو توڑ کر روزگار پیدا اور برانڈز ڈویلپ کر رہی ہیں، ایف پی سی سی آئی سمیڈا کے اشتراک سے خواتین انٹرپنیوشپس کی کیپسٹی بلڈنگ اور ٹریننگ کیلئے پرعزم ہے،
سی ای او سمیڈا مس نادیہ نے تقریب سے خطاب کرتے ہوئے کہا کہ حکومت سمال اینڈ میڈیم انٹرپرائزز کے ذریعے خواتین کو معاشی بااختیار بنانے کیلئے پرعزم ہے، خواتین کو قرضوں کی فراہمی اور اسکلز ڈویلپمنٹ کے ذریعے معاشی طور پر بااختیار بنایا جا سکتا ہے،
تقریب سے وزیراعظم کے معاون خصوصی برائے صنعت ہارون اختر خان نے خطاب میں کہا کہ وفاقی حکومت خواتین کے مسائل حل کرنے اور سہولیات فراہم کرنے کیلئے پرعزم ہے، حکومت سمال انٹرپرائز کے ذریعے خواتین کو معاشی طور پر بااختیار بنانے کیلئے کام کر رہی ہے، پاکستان کی پچاس فیصد سے زائد آبادی خواتین پر مشتمل ہے، ہم صرف اپنی پچاس فیصد ورک فورس کے ذریعے کام کر رہے ہیں، دنیا بھر کی تمام بڑی ائیر لائنز میں خواتین کام کر رہی ہیں، خواتین متحرک کردار کے ذریعے معاشی ترقی کے سفر میں اپنا حصہ ڈالیں،
