روسی وزارت دفاع نے اپنی بریفنگ میں دعویٰ کیا کہ روسی فوجی دستوں نے ڈونیٹسک خطے میں پوکروفسک کے مقام پر گھیرے میں لی گئی یوکرینی فوج پر اپنے حملے جاری رکھے ہیں۔ یوکرین کی جانب سے اسی روز کہا گیا کہ اس نے پوکروفسک محاذ پر روسی فوج کے حملوں کو پسپا کیا ہے۔
روسی وزارت دفاع کے مطابق، روسی فوجی دستے پوکروفسک علاقے میں ریلوے اسٹیشن اور اس کے آس پاس کی صنعتی پٹی میں محصور یوکرینی فوجیوں پر حملے کر رہے ہیں۔ روسی فوج نے مشرق کی جانب سے یوکرینی دستوں کے گھیراؤ کو مزید سخت کرتے ہوئے شہر کے مشرقی علاقوں میں ان پر حملے کیے اور شہر کے شمالی اور شمال مغربی محاذ پر یوکرینی فوج کی جانب سے محاصرہ توڑنے کی نو کوششوں کو ناکام بنا دیا۔ علاوہ ازیں، روسی دستوں نے پوکروفسک کے قریب ہی واقع دیمیتروف شہر میں اپنا کنٹرول مضبوط کیا ہے۔
یوکرین مسلح افواج کے جنرل اسٹاف کی جانب سے اسی روز جاری بیان میں بتایا گیا کہ روسی فوج نے پوکروفسک کے متعدد مقامات پر یوکرینی فوج پر حملے کیے۔ یوکرینی دفاعی دستوں نے روسی فوج کے چھتیس حملوں کو روکا ہے۔ محاذ جنگ پر موجود ایک یوکرینی فوجی افسر نے یوکرینی میڈیا کو دیے گئے انٹرویو میں بتایا کہ پوکروفسک میں اب بھی جھڑپیں جاری ہیں ۔
