اسلام آباد (آئی پی ایس )آذربائیجان میں ہر سال 27 ستمبر کو یوم شہدا منایا جاتا ہے، اس دن کی مناسبت سے اسلام آباد میں آذربائیجان کے سفارتخانے میں ایک پروقار تقریب کا انعقاد کیا گیا جس میں شہدا کو خراج عقیدت پیش کیا گیا۔ اس موقع پر آذری سفارتخانے میں پاکستان اور آذربائیجان کے ترانے بجائے گئے اور شہدا کی یاد میں ایک منت کی خاموشی اختیار کی گئی۔
اس موقع پر آذربائیجان کے سفیر خضر فرہادوف نے پریس کانفرنس کرتے ہوئے کہا کہ آرمینیا نے تقریبا 30 سال تک آذربائیجان کے علاقوں کو غیر قانونی طور پر اپنے قبضے میں رکھا۔ ان سالوں کے دوران آرمینیا نے ہمیشہ آذربائیجان کے خلاف اشتعال انگیزی کی۔2 سال پہلے 27 ستمبر 2020 کو آذربائیجان کی فوج کے ٹھکانوں اور شہری بستیوں پر آرمینیا کے ایک فوجی حملے کے جواب میں جوابی کارروائی شروع کی گئی۔ 44 روزہ جنگ کے اختتام پر آذربائیجان کی مسلح افواج نے سپریم کمانڈر انچیف صدر الہام علیوف کی قیادت میں آذربائیجان کے علاقوں کو آرمینیائی قبضے سے آزاد کرایا اور آرمینیا کو آذربائیجان کی تاریخی فتح کو تسلیم کرنے کا معاہدہ کرنے ہر مجبور کر دیا۔آذربائیجان کے فوجیوں اور افسروں کے لیے،جو جنگ میں بہادری سے لڑے، آزاد کردہ سرزمینوں میں آذربائیجان کا پرچم لہرایا اور آذربائیجان کی علاقائی سالمیت کے لیے اپنی جانوں کا نذرانہ پیش کیا، 27 ستمبر کو یومِ شہدا کی یاد کے طور پر منایا جاتا ہے۔
آذری سفیر نے کہا کہ ان علاقوں میں 67 مساجد جو آرمینیائی قبضے میں تھیں، 65 کو زمین بوس کر دیا گیا ہے اور باقی 2 کو شدید نقصان پہنچایا گیا ہے اور ان کی بے حرمتی کی گئی ہے، انہیں خنزیر اور گائے کے اصطبل کے طور پر استعمال کیا گیا، یہاں تک کہ قبرستانوں کی بے حرمتی، تباہی اور لوٹ مار کی گئی۔آذربائیجان کی محب وطن جنگ نے آرمینیا کی تقریبا 30 سالہ جارحیت کی پالیسی کا خاتمہ کر دیا۔ آذربائیجان نے اپنی علاقائی سالمیت کو یقینی بنایا، اور تقریبا 10 لاکھ بے گھر آذربائیجانوں کے بنیادی حقوق بحال ہوئے۔ آذربائیجان نے اکیلے اقوام متحدہ کی سلامتی کونسل کی 1993 کی متعلقہ قراردادوں پر عمل درآمد کو یقینی بنایا۔انہوں نے کہا کہ برادر اسلامی ملک پاکستان نے سابقہ کاراباخ تنازعہ کے پہلے دن ہی سے حمایت کے ساتھ ساتھ 2020 میں محب وطن جنگ کے دوران آذربائیجان کے منصفانہ موقف کی اخلاقی اور سیاسی حمایت کی تھی اور اسے آذربائیجان کی حکومت اور عوام نے بے حد سراہا ہے۔آزادی کے فورا بعد، آذربائیجان نے آزاد کرائے گئے علاقوں میں بڑے پیمانے پر تعمیر نو اور بحالی کا کام شروع کیا۔2021 اور 2022 میں، آذربائیجان کی حکومت نے آزاد کرائی گئی زمینوں میں بڑے پیمانے پر تعمیر نو اور بحالی کی سرگرمیوں کے لیے تقریبا 3 ارب ڈالر مختص کیے تھے۔
فزولی انٹرنیشنل ایئرپورٹ جو صرف 8 ماہ میں بنایا گیا تھا اب آپریشنل ہے۔ 2 مزید بین الاقوامی ہوائی اڈے زنگیلان اور لاچن زیر تعمیر ہیں اور وہ بھی بہت جلد آپریشنل ہو جائیں گے۔نقل مکانی کرنے والے آذربائیجانی پہلے ہی آزاد کرائے گئے زنگیلا علاقے کے آغالی گاں میں واپس آچکے ہیں، جسے "سمارٹ ولیج” کے تصور کی بنیاد پر دوبارہ تعمیر کیا گیا تھا۔ آذربائیجان کا ثقافتی دارالحکومت شوشا پہلے ہی بین الاقوامی تقریبات کا ایک مرکز بن چکا ہے۔ "پاکستان کلرز” گروپ نے مئی 2022 میں شوشا میں منعقد ہونے والے 5ویں "خریبل بل” بین الاقوامی لوک کلور فیسٹیول میں "بھنگڑا” رقص پیش کیا۔آذربائیجان نے جنگ کے فورا بعد آرمینیا کو امن کی پیشکش کی۔ یہ شاید دنیا کی عسکری تاریخ کی چند مثالوں میں سے ایک تھی جب زمینیں 30 سال تک قبضے میں رہیں، لوگ مصائب اور محرومیوں میں زندگی بسر کرتے رہے، تاریخی اور مذہبی یادگاریں تباہ ہوئیں، شہروں کو زمین بوس کر دیا گیا، اور ایک سے زیادہ ملین بارودی سرنگیں بچھائی گئیں، اور پھر بھی آذربائیجان امن کی پیشکش کر رہا ہے۔ تاہم آرمینیا امن میں دلچسپی نہیں رکھتا۔ آذربائیجان کی طرف حد بندی کی تجویز پیش کی گئی ہے لیکن آرمینیا نے اس میں تاخیر کی۔ ہم نے آرمینیا کے ساتھ امن معاہدے پر دستخط کرنے کے لیے 5 اصول تجویز کیے ہیں۔ زبانی تو انہوں نے قبول کر لیا لیکن عملی طور پر ہمیں نظر نہیں آتا۔مزید برآں، پچھلے چند مہینوں میں آرمینیا نے آذربائیجان کے خلاف بارہا فوجی اشتعال انگیزی کا ارتکاب کیا ہے۔
صرف لاچین ضلع میں 1,400 سے زیادہ نئی بارودی سرنگیں بچھائی گئیں اور یہ بارودی سرنگیں جنگ کے بعد 2021 میں بچھائی گئیں۔ یہ آذربائیجان کے خلاف دہشت گردی کی واضح کارروائی ہے۔ جنگ کے خاتمے کے بعد سے 240 سے زیادہ آذربائیجانی شہری بارودی سرنگ کے دھماکوں کی وجہ سے ہلاک یا شدید زخمی ہو چکے ہیں۔آرمینیائی مسلح افواج نے 13 ستمبر کو ایک بار پھر آذربائیجان-آرمینیا کی ریاستی سرحد کی دشکاسان، کالبازار اور لاچین سمتوں میں بڑے پیمانے پر اشتعال انگیزی کی۔ آرمینیائی مسلح افواج کے تخریب کار گروپوں نے علاقے کے پہاڑی علاقے اور موجودہ کھائی کے خلا کو استعمال کرتے ہوئے مختلف سمتوں میں آذربائیجان آرمی یونٹس کی پوزیشنوں کے درمیان علاقوں اور سپلائی سڑکوں کی کاٹ دیا لیکن یقینا شاندار آذربائیجانی فوج نے جواب دیا اور دشمن کو واپس اپنی جگہ پر بھیج دیا۔13 ستمبر کو ہمارے جوان پھر شہید ہوئے۔ اللہ ہمارے تمام شہدا کو اپنے جوار رحمت میں جگہ دے۔
