عام انتخابات کے نتائج سپریم کورٹ میں چیلنج

اسلام آباد(آئی پی ایس)8فروری کے عام انتخابات کے نتائج کو سپریم کورٹ میں چیلنج کر دیا گیا۔
تفصیلات کےمطابق سابق کمشنر راولپنڈی لیاقت علی چٹھہ الزامات پر بنائی گئی الیکشن کمیشن کمیٹی کو بھی چیلنج کیا گیا ہے ، چیف الیکشن کمشنر اور ممبر الیکشن کمشن کی تعیناتی کو بھی سپریم کورٹ میں چیلنج کر دیا گیا۔

پی ٹی آئی رہنما شیر افضل مروت نے سپریم کورٹ میں آئینی درخواست دائر کر دی جس میں استدعا کی گئی کہ چیف الیکشن کمشنر اور ممبران کی تعیناتی کالعدم قرار دی جائے، قومی اور صوبائی اسمبلیوں کے تمام فارم 47 کالعدم قرار دئیے جائیں، الیکشن کمیشن کی جانب سے تشکیل دی گئی اعلیٰ سطح کی کمیٹی کالعدم قرار دی جائے، دھاندلی کے الزامات کی انکوائری کے لیے وزارتِ داخلہ کو جوڈیشیل کمیشن بنانے جا حکم دیا جائے۔
عدالت سے استدعا کی گئی کہ وفاقی اور صوبائی حکومتوں کی تشکیل روک دی جائے، وفاقی اور صوبائی حکومتوں کو کوئی بھی احکامات جاری کرنے سے روکا جائے۔