اسلام آباد ، پاکستان میں کورونا کیسز کی یومیہ شرح 9 فیصد پر آگئی ، ایک روز مزید 32 اموات اور 5 ہزار سے زائد کیسز سامنے آئے۔ نیشنل کمانڈ اینڈ آپریشن سینٹر (این سی او سی )نے ملک میں جاری کورونا وبا کے تازہ ترین اعدادو شمار جاری کردیے جس کے مطابق ملک میں 24 گھنٹے میں کورونا سے مزید 32 مریض انتقال کرگئے ، جس کے بعد کورونا سے انتقال کرنے والے افراد کی مجموعی تعداد 29 ہزار 301ہوگئی ہے۔این سی اوسی کے مطابق 24گھنٹے میں کورونا کے 55 ہزار 202 ٹیسٹ کیے گئے، جس میں سے کورونا کے مزید 5 ہزار 327 کیسز رپورٹ ہوئے ، اس دوران ملک میں کورونا کے کیسز مثبت آنے کی شرح 9.65 فیصد تک جا پہنچی ہے۔این سی او سی کے مطابق ملک میں کورونا کے ایک ہزار 500 زیرعلاج مریض انتہائی نگہداشت میں ہیں جبکہ ملک بھر میں کورونا سے متاثر ہونے والوں کی مجموعی تعداد 14 لاکھ 30 ہزار 366 تک پہنچ گئی ہے۔اعداد و شمار کے مطابق سندھ میں کورونا کیسز کی تعداد پانچ لاکھ 43 ہزار 170، پنجاب میں 4 لاکھ 80 ہزار421 ، خیبرپختونخوا میں ایک لاکھ 94 ہزار887 اور بلوچستان میں 34 ہزار417 ہے جبکہ اسلام آباد میں ایک لاکھ 28 ہزار 429 ، گلگت بلتستان میں 10 ہزار703 اور آزاد کشمیر میں 38 ہزار339 کیسز سامنے آچکے ہیں۔
