کراچی،پاکستان نے پہلے ٹی 20میچ میں ویسٹ انڈیز کو63رنز سے شکست دے دی ہے۔
کراچی کے نیشنل کرکٹ سٹیڈیم میں پاکستان اور ویسٹ انڈیز کے مابین پہلے ٹی 20میچ میں ویسٹ انڈیز کے کپتان نکولس پوران نے ٹاس جیت کر پاکستانی قائد بابر اعظم کو بیٹنگ کرنے کی دعوت دی تھی۔مہمان ٹیم پاکستان کی جانب سے دیا گیا 201 رنز کا ہدف حاصل کرنے میں ناکام رہی اور 137سکور بناکر پویلین لوٹ گئی،شائی ہوپ نے سب سے زیادہ 31رنز بنائے،پاکستان کی جانب سے وسیم جونیئر نے شاندار بالنگ کا مظاہرہ کرتے ہوئے 4اوورز میں 40رنز دیکر 4کھلاڑیوں کا شکار کیا،شاداب خان نے 3،شاہین آفریدی،حارث رئوف اور محمد نواز نے ایک،ایک وکٹ اپنے نام کی۔ ویسٹ انڈیز کی طرف سے اننگز کا آغاز شائی ہوپ اور کنگ نے کیا، تاہم دوسرے اوور کی پہلی ہی گیند پر سپنر محمد نواز نے 7 کے مجموعی سکور پر برینڈن کنگ کی وکٹ حاصل کی۔اس کے بعد کیریبین ٹیم کے نوجوان کپتان نکولس پوران نے جارحانہ انداز اپنایا اور حریف باولرز کو دو بلند و بالا چھکے لگائے، اس دوران نوجوان فاسٹ باولر محمد وسیم کی شاندار گیند پر وہ بولڈ ہو گئے۔ انہوں نے 10 گیندوں پر 18 رنز بنائے۔ چھٹے اوور کی دوسری گیند پر محمد وسیم نے ایک مرتبہ پھر وکٹ حاصل کی، تھامس 2 رنز بنا کر آوٹ ہو گئے۔اس سے قبل قومی ٹیم کی جانب سے کپتان بابر اعظم اور محمد رضوان نے اننگز کا آغاز کیا مگر بابر اعظم بغیر کوئی سکور بنائے عقیل حسین کی گیند پر پہلے اوور کی دوسری ہی بال پر پویلین لوٹ گئے۔پاکستان نے مقررہ 20اوورز میں6وکٹوں کے نقصان پر200رنز بنائے،فخر زمان10سکور بناکر شیفرڈ کی گیند پر بروکس کو کیچ دے بیٹھے،محمد رضوان نے شاندار بلے بازی کا مظاہرہ کرتے ہوئے52گیندوں پر 78رنز کی اننگزکھیلی اور شیفرڈ کا شکار بنے،حیدر علی نے بھی نصف سنچری سکور کی ،چوتھے آوٹ ہونے والے بیٹسمین آصف علی تھے جو کہ صرف 1رنز بناکر پویلین لوٹ گئے،افتخار احمد 7سکور بناکر سمتھ کا شکار بنے،حیدر علی نے 68رنز کی اننگز کھیلی اور ڈریکس کی گیند پر کیچ دے بیٹھے۔پاکستان کی جانب سے محمد نواز نے جارحانہ بلے بازی کا مظاہرہ کرتے ہوئے صرف 10گیندوں پر2چھکوں اور 3چوکوں کی مدد سے 30رنز بنائے اور ناٹ آوٹ رہے ،ویسٹ انڈیز کی جانب سے شیفرڈ نے سب سے زیادہ 2کھلاڑیوں کو آوٹ کیا۔چار چھکوں اور 6چوکوں کی مدد سے 39گیندوں پر 68رنز کی برق رفتار اننگز کھیلنے پر حیدر علی کو میچ کا بہترین کھلاڑی قرار دیا گیا۔اس موقع پر انہوں نے کہا کہ رضوان نے کافی سپورٹ کیا،پچ کافی مشکل تھی،مجھے جس بھی نمبر پر کھلایا جائے گا پرفارم کروں گا۔
