اسلام آباد ، پی ٹی آئی رکن اسمبلی ریاض فتیانہ نے وزرا کی لڑائی کا الزام لگایا تو پارٹی احتسابی عمل کی زد میں آگئے، تحریک انصاف کی احتساب و انضباطی و کمیٹی نے ریاض فتیانہ کو شوکاز نوٹس جاری کردیا، تحریک انصاف کی قائمہ کمیٹی برائے،احتساب وڈسپلن نے چار دسمبر تک وضاحت مانگ لی ۔
شوکاز نوٹس میں کہا گیا کہ آپ ماہ نومبر میں کسی این جی او کی طرف سے گلاسگو کوپ 26 کانفرنس میںگئے ، آپ پاکستانی ٹیم سے غیر قانونی طور پر سرکاری وفدکو حصہ بننے کی فرمائش کرتے رہے، وفد میں آپ کی شمولیت وزیر اعظم کی منظوری کے بغیر ممکن نہیں تھی، آپ گلاسگو میں وفد سے اپنے استعمال کیلئے گاڑیاں بھی مانگتے رہے، آپ نے وفد سے کانفرنس کارڈ اور فون سم کی بھی فرمائش کی، جب آپ کے مطالبات نہ مانے گئے تو آپ نے وطن واپسی پر حکومتی وفد پر الزامات لگا دئیے ، آپ نے بطور ممبر پبلک اکاونٹس کمیٹی حکومتی وفد پر لڑائی سمیت دیگر الزامات لگائے،الزامات کا ثبوت دیں،میڈیا نے رپورٹ کیا کہ آپ نے الزام لگایا کہ ملک امین اسلم اور زرتاج گل کی لڑائی کے باعث زرتاج واپس آئی، لڑائی کا الزام جھوٹ ہے، زرتاج گل پارلیمنٹ کے مشترکہ اجلاس میں شرکت کیلئے پاکستان واپس آئی۔ شو کاز نوٹس میں ڈسپلن کی خلاف ورزی پر ریاض فتیانہ سے 4دسمبرتک تحریری جواب طلب کرلیا گیا ۔ نوٹس میں کہا گیا کہ الزامات کے تحریری شواہد، کوائف اور دیگر ثبوت بھی فراہم کریں، تحریک انصاف احتساب و انضباطی کمیٹی نے ملک امین اسلم کی درخواست پر شوکاز نوٹس جاری کیا۔
