اسلام آباد (آئی پی ایس ) اسلام آباد میں سی ڈی اے کی تجاوزارت کے خلاف مہم جاری ہے۔ جس کے دوران مزید 72 گھروں کے سامنے غیرقانونی تعمیرات کو مسمار کردیا گیا ۔ تجاوزات کے خلاف یہ آپریشن جی ٹین فور میں تھرڈ روڈ کے علاقے میں انفورسمنٹ ڈائریکٹوریٹ کے عملے نے کیا۔ آپریشن کے دوران غیر قانونی شیڈز، باڑ، داخلی دروازے، گرل، دیواریں اور کمرے بھاری مشینری کی مدد سے توڑ دئیے گئے جبکہ متعدد رہائشیوں نے سی ڈی اے انتظامیہ کی جانب سے جاری کردہ نوٹس کی تعمیل میں ازخود بھی تجاوزات کا خاتمہ کردیا ۔ اسلام آباد میں جاری اس خصوصی مہم کے دوران مختلف سیکٹروں میں اب تک مجموعی طور پر 282 گھروں کے باہر غیر قانونی تعمیرات کو ختم کیا جاچکا ہے متعلقہ حکام کے مطابق تجاوزات کے مکمل خاتمے کے لئے یہ آپریشن آئندہ دنوں بھی جاری رہے گا۔ اس ضمن میں سی ڈی اے انتظامیہ نے ایک بار شہریوں کو خبردار کیا ہے کہ اپنے گھروں کے باہر قائم غیرقانونی تعمیرات ازخود ختم کردیں تاکہ دوران آپریشن کسی بھی نقصان سے بچا جا سکے۔
