اسرائیل ہم سے نہ الجھے، اپنی طاقت کی ابھی صرف ایک جھلک دکھائی ہے، ایرانی صدر

تہران(آئی پی ایس) ایران کے صدر مسعود پیزشکیان نے کہا ہے کہ اسرائیل پر حملے ایران کے مفادات کے تحفظ اور اپنے شہریوں کے دفاع میں کیے ہیں۔
عالمی میڈیا کے مطابق اسرائیل پر سیکڑوں بیلسٹک میزائل حملوں کے بعد ایران کے صدر مسعود پیزشکیان نے اپنی ٹوئٹ میں اسرائیلی وزیراعظم نیتن یاہو کو خبردار کیا ہے۔
صدر مسعود پیزشکیان نے مزید کہا کہ پاسداران انقلاب کے اسرائیل کے قلب پر میزائل حملوں کے بعد نیتن یاہو کو جان لینا چاہیے کہ ایران جنگجو نہیں ہے، لیکن اپنی سلامتی کے خلاف کسی بھی خطرے کے سامنے سے مضبوطی سے کھڑا ہے۔
ایرانی صدر نے یہ بھی کہا کہ اپنے دفاع کا حق استعمال کرتے ہوئے ایران نے خطے کے امن اور سلامتی کے لیے صیہونی حکومت کی جارحیت کا فیصلہ کن جواب دیا ہے۔
صدر مسعود پیزشکیان نے کہا کہ اسرائیل پر میزائل حملے ایران کے مفادات کے تحفظ اور اپنے شہریوں کے دفاع میں کیے گئے اور یہ ہماری طاقت کی صرف ایک جھلک ہے۔ اس لیے اسرائیل ہمارے ساتھ نہ الجھے۔