اسلام آباد(آئی پی ایس ) وفاقی وزیر داخلہ محسن نقوی نے کہا ہے کہ سکیورٹی پلان پر عمل میں کسی قسم کی غفلت برداشت نہیں۔ وفاقی وزیر داخلہ محسن نقوی کی زیرصدارت وزارت داخلہ میں اہم اجلاس ہوا جس میں غیر ملکیوں خصوصا چینی شہریوں کی حفاظت کے لئے کئے گئے اقدامات کا جائزہ لیا گیا۔
محسن نقوی کی زیر صدارت اجلاس میں ملک میں سکیورٹی کی مجموعی صورتحال پر بھی غور کیا گیا اور وفاقی وزیر داخلہ نے سکیورٹی پلان کے ایس او پیز پر من و عن عملدرآمد کی ہدایت کی۔وفاقی وزیر داخلہ کو وزارت داخلہ سمیت متعلقہ اداروں کی جانب سے سکیورٹی پلان اور مجموعی صورتحال پر بریفنگ دی گئی۔اس موقع پر محسن نقوی نے کہا ہے کہ وضع کردہ پلان کی ہر سطح پر باقاعدہ مانیٹرنگ کی جائے،
ملک دشمن عناصر کے مذموم عزائم خاک میں ملانے کے لئے متعلقہ ادارے قریبی رابطہ رکھیں، سکیورٹی پلان پر عمل میں کسی قسم کی غفلت کی گنجائش نہیں۔اجلاس میں وفاقی سیکرٹری داخلہ خرم علی آغا، سربراہ نیکٹا محمد طاہر رائے، کوآرڈی نیٹر نیشنل ایکشن پلان، متعلقہ اداروں اور وزارت داخلہ کے سینئر حکام نے شرکت کی۔
