اسلام آباد ہائیکورٹ آرڈر کرتی ہے کہ گرفتار نہیں کرنا تو پھر بھی گرفتار کرلیا جاتا ہے،جسٹس گل حسن کے ریماکس
اسلام آباد (آئی پی ایس )اسلام آباد ہائیکورٹ نے ڈپٹی کشمنر (ڈی سی) اسلام آباد عرفان نواز میمن اور دیگر کی توہین عدالت کیس میں سزا کا فیصلہ معطل کردیا۔ اسلام آباد ہائیکورٹ میں ڈی سی اسلام آباد اور دیگر کی سنگل بنچ کے توہین عدالت سے متعلق فیصلے کے خلاف اپیل پر سماعت ہوئی
، چیف جسٹس عامر فاروق اور جسٹس میاں گل حسن اورنگزیب سماعت کی۔ڈپٹی کمشنر اسلام آباد عرفان نواز میمن اپنے وکیل راجہ رضوان عباسی کے ساتھ عدالت میں پیش ہوئے۔اس کے علاوہ ایس ایس پی آپریشنز ملک جمیل ظفر اپنے وکیل شاہ خاور اور ایس ایچ او تھانہ مارگلہ ناصر منظور اپنے وکیل عمران فیروز کے ساتھ عدالت میں پیش ہوئے۔وکیل شاہ خاور نے بتایا کہ ڈی سی راولپنڈی نے بانی پی ٹی آئی کی گرفتاری کے بعد شہریار آفریدی کے لیے ایم پی او آرڈر جاری کیا تھا۔ جسٹس میاں گل حسن اورنگزیب نے کہا کہ اسلام آباد ہائیکورٹ آرڈر کرتی ہے کہ گرفتار نہیں کرنا تو پھر بھی گرفتار کرلیا جاتا ہے، ہمارے آرڈر کو نظر انداز کردیا جاتا ہے،
جب توہینِ عدالت کی کارروائی ہوتی ہے تو معافیاں مانگتے ہیں۔اسلام آباد ہائیکورٹ نے ڈی سی اسلام آباد اور دیگر کی سزاں کو عارضی طور پر معطل کرتے ہوئے کیس کی سماعت ملتوی کردی۔توہین عدالت کیس فیصلے کیخلاف ڈپٹی کمشنر اسلام آباد و دیگر کی اپیلیں سننے والا بینچ ٹوٹ گیااسلام آباد ہائیکورٹ نے کہا کہ آئندہ سماعت تک سزائیں معطل رہیں گی۔
