اسلام آباد(آئی پی ایس)وزیر مذہبی امور انیق احمد سے انڈونیشیا کے سفیر آدم مولاوارمین توجیو نے جمعہ کے روز انکے دفتر میں ملاقات کی۔ دونوں رہنماؤں کے مابین باہمی دلچسپی کے امور پر تبادلہ خیال کیا گیا۔ سب سے بڑی مسلم آبادی والے ممالک ہونے کے ناطے پاکستان اور انڈونیشیا کی جانب سے معاشرے میں قرآنی تعلیمات کے فروغ کیلئے مشترکہ کوششیں کرنے پر اتفاق کیا گیا۔ امت مسلمہ کو درپیش چیلنجز کے حل کیلئے مکالمہ کے کلچر کو فروغ دینے سمت متعدد امور پر تبادلہ خیال کیا گیا۔ نئی نسل کو دینی تعلیمات سے روشناس کروانے اور عہد حاضر کے مسائل سے نبردآزما کرنے کیلئے علمائے کرام اور سکالرز کے مؤثر کردار کی ضرورت پر زور دیا گیا۔ دونوں رہنماؤں نے ایک دوسرے کے تجربات سے فائدہ اٹھانے اور عوامی سطح پر تعلقات کے فروغ کے عزم ظاہر کیا۔
