اسلام آباد(آئی پی ایس) وزارت خزانہ نے سرکاری ملازمین کے سفری اور ڈیلی الاؤنس میں اضافہ کردیا۔
وزارت خزانہ کی جانب سے جاری نوٹیفکیشن کے مطابق گریڈ ایک سے 22 تک کے ملازمین کے سفری اور ڈیلی الاؤنس میں 50 فیصد اضافہ کیا گیا ہے جس پر عملدرآمد رواں سال یکم جولائی سے ہی ہو گا۔
نوٹیفکیشن کے مطابق گریڈ 22 کے افسر کا ڈیلی الاؤنس 7200، گریڈ 21 کا 6 ہزار، گریڈ 20 اور 19 کا 4920، گریڈ 18اور 17کا 3840، گریڈ 16 سے 12 کا 2160 جبکہ گریڈ 11 سے 5 کے ملازم کا ڈیلی الاؤنس 1320 روپے ہو گا۔
سرکاری ملازمین کیلئے ٹرانسپورٹ الاؤنس میں اضافے کا نوٹیفکیشن بھی جاری کردیا گیا ہے جس کے مطابق ٹرانسپورٹ الاؤنس میں کار کیلئے 7.50 روپے اور موٹر سائیکل کیلئے 3.75 روپے فی کلو میٹر اضافہ کیا گیا ہے۔
اس کے علاوہ ذاتی کار کے استعمال کی صورت میں سفری الاؤنس 15 روپے اور موٹرسائیکل کے استعمال کی صورت میں 6 روپے فی کلومیٹر اضافہ کر دیا گیا ہے۔
نوٹیفکیشن کے مطابق ٹرانسپورٹ اور ڈیلی الاؤنس بڑے شہروں کیلئے نافذ العمل ہو گا۔
