لاہور(آئی پی ایس) پاکستان کے پہلے نشانِ حیدر کیپٹن محمد سرور شہید کی 75 ویں برسی آج منائی جارہی ہے۔
کیپٹن محمد سرور نے کشمیر پر بھارتی فوج کی جارحیت کے دوران ارض وطن کا دفاع کرتے ہوئے 27 جولائی 1948ء کو تل پتراا، آزاد کشمیر کے مقام پر جام شہادت نوش کیا تھا۔
قیام پاکستان کے بعد کیپٹن محمد سرور شہید نے پاک فوج میں شمولیت اختیار کی اور وہ 1948 میں پنجاب رجمنٹ کے سیکنڈ بٹالین میں کمپنی کمانڈر کے عہدے پر خدمات انجام دے رہے تھے جب انہیں کشمیر میں آپریشن پر مامور کیا گیا۔
انہوں نے 27 جولائی 1948 کو کشمیر کے اوڑی سیکٹر میں دشمن کی اہم فوجی پوزیشن پر ایسا حملہ کیا کہ دشمن کو اپنی چوکی چھوڑ کر بھاگنا پڑا۔
کیپٹن محمد سرور شہید نے مادر وطن کے دفاع کے کمال بہادری، جرأت کا مظاہرہ کرتے ہوئے سینے پر گولی کھائی اور جام شہادت نوش کیا، بے مثال قربانی اور بہادری کی بدولت کیپٹن محمد سرور شہید کو نشان حیدر سے نوازا گیا۔
دوسری جانب پاکستان کی مسلح افواج نے کیپٹن محمد سرور شہید کی برسی پر شاندار خراج عقیدت پیش کیا ہے۔
پاک فوج کے شعبہ تعلقات عامہ (آئی ایس پی آر) کی جانب سے جاری کردہ بیان میں کہا گیا کہ کیپٹن سرور شہید کی بے مثال جرأت و بہادری اور ثابت قدمی ہمیشہ یاد رکھی جائے گی، ان کا یوم شہادت افواج پاکستان کی مادر وطن کیلئے دی جانے والی ان گنت قربانیوں کا مظہر ہے۔
بیان میں مزید کہا گیا کہ پاکستان کے یہ درخشندہ ستارے جنہوں نے ملک کی آبرو کیلئے اپنی جان نچھاور کی بِلاشُبہ عزت و تکریم کے مستحق اور پوری قوم کا فخر ہیں۔
