لاہور :پاکستان مسلم لیگ کے صدر چودھری شجاعت حسین نے کہا ہے کہ اتحادی جماعتیں،اپوزیشن حکومت کا نہیں معیشت کا سوچیں، معیشت کی بحالی اور مہنگائی کے خاتمے پر توجہ نہ دی گئی تو ملک مزیدمشکلات میں گھر جائے گا ،عام آدمی تکلیف میں ہے، ہمیں اسکی مشکلات کا احساس کرنا ہو گا، مہنگائی کے آگے بندھ نہ باندھا گیا تو الیکشن کرانے میں مشکلات آسکتی ہیں۔تفصیلات کے مطابق چودھری شجاعت حسین سے پارٹی کے مرکزی سیکرٹری اطلاعات غلام مصطفیٰ ملک نے لاہور میں انکی رہائش گاہ پر تفصیلی ملاقات کی جس میں پارٹی امور ، نگران حکومت کے قیام ، آئندہ انتخابات میں پارٹی حکمت عملی، مختلف سیاسی جماعتوں سے سیٹ ایڈجسٹمنٹ بارے میں مشاورت کی گئی،چودھری شجاعت حسین نے بعض اہم امور پر پارٹی کے مرکزی سیکرٹری اطلاعات کو ہدایات بھی جاری کیں،مصطفیٰ ملک مسلم لیگ کی صوبائی تنظیموں کی کارکردگی اور پارٹی کے سنٹرل سیکرٹریٹ کے معاملات بارے بھی پارٹی سربراہ کو بریفنگ دی،چودھری شجاعت حسین نے پارٹی راہنماوں اور کارکنوں کی کارکردگی پر خوشی اور اطمینان کا اظہار کیا اور انکی جدوجہد کو خراج تحسین پیش کیا ۔چودھری شجاعت حسین نے کارکنوں پر زور دیا کہ وہ تنظیم سازی کے حوالے سے متحرک کردار ادا کریں اور پارٹی کا پیغام ہر سطح تک پہنچائیں، چودھری شجاعت حسین نے مصطفیٰ ملک کو اووسیز مسلم لیگ کے حوالے سے جامع رپورٹ مرتب کرنے کی ہدایت کی اور مختلف ممالک میں قائم تنظیموں سے رابطہ کرکے انہیں فعال اور متحرک بنانے پر زور دیا، سربراہ ق لیگ نے کہا کہ اتحادی جماعتیں،اپوزیشن حکومت کا نہیں معیشت کا سوچیں، معیشت کی بحالی اور مہنگائی کے خاتمے پر توجہ نہ دی گئی تو ملک مشکلات میں گھر جائے گا ۔چودھری شجاعت حسین نے مزید کہا کہ عام آدمی تکلیف میں ہے، ہمیں اسکی مشکلات کا احساس کرنا ہو گا،ملاقات کے بعد مصطفیٰ ملک نے بتایا کہ ابھی تک نگران حکومت کے حوالے سے حکومتی سطح سے مشاورت نہیں ہے، ہم سمجھتے ہیں کہ نگراں حکومت مکمل طور پر غیرجانبدار ،محب وطن افراد اور معاشی ماہرین پر مشتمل ہونی چاہیے کیونکہ مہنگائی کے سامنے بندھ نہ باندھا گیا تو الیکشن کرانے میں مشکلات درپیش آسکتی ہیں۔
