اسلام آباد(آئی پی ایس)اسلام آباد چیمبر آف کامرس اینڈ انڈسٹری کے صدر احسن ظفر بختاوری نے کہا کہ ترقی یافتہ ممالک نے اکیڈمیا انڈسٹری روابط کو مضبوط کر کے پائیدار اقتصادی ترقی حاصل کی ہے اور اس بات پر زور دیا کہ ہمیں بھی صنعت کاری کو فروغ دینے اور معیشت کی بحالی کے لیے یہی طرز عمل اپنانا ہوگا۔ انہوں نے کہا کہ اکیڈمیا اور انڈسٹری کے قریبی روابط سے یونیورسٹیوں کو انڈسٹری کے ضرورت کے مطابق طلبا تیار کرنے میں مدد ملے گی جبکہ صنعتی شعبے کی پیداوار بھی بہتر ہو گی اور ویلیو ایڈڈ مصنوعات تیار ہونے سے برآمدات میں خاطر خواہ اضافہ ہو گا۔
ان خیالات کا اظہار انہوں نے انٹرنیشنل اسلامک یونیورسٹی اسلام آبادکے زیر اہتمام منعقدہ ٹیک سپارک نمائش کی افتتاحی تقریب سے بطور مہمان خصوصی خطاب کرتے ہوئے کیا۔احسن بختاوری نے اس موقع پر انٹرنیشنل اسلامک یونیورسٹی اسلام آباد کے صدر ڈاکٹر ھذال حمود علطیبی اور چیمبر کے وفد کے ہمراہ نمائش میں طلبا کی طرف سے لگائے گئے مختلف اسٹالز کا دورہ کیا اور ان کے پراجیکٹس کی تعریف کی اور کہا کہ طلبا نے معاشرے کی ضروریات کے مطابق اپنے پراجیکٹس تیار کیے ہیں۔
انہوں نے یقین دلایا کہ آئی سی سی آئی انٹرنیشنل اسلامک یونیورسٹری کے طلبا کو متعلقہ صنعتوں سے متعارف کرانے میں مدد کرے گا تاکہ ان کے پراجیکٹس سے صنعتی شعبے اور معاشرے کو فائدہ پہنچے۔ انہوں نے مزید کہا کہ چیمبر یونیورسٹی کے طلبا کو انٹرنشپ کے مواقع فراہم کرنے کے لیے بھی تعاون کرے گا۔ انہوں نے پاکستان میں صنعت اور تعلیم کے فروغ کیلئے سعودی حکومت کے کردار کو بھی سراہا۔احسن ظفر بختاوری نے اپنی ٹیم کے ہمراہ انٹرنیشنل اسلامک یونیورسٹی کے صدر ڈاکٹر ھذال حمود علطیبی سے ان کے دفتر میں ملاقات کی اور اکیڈمیا انڈسٹری روابط کو مضبوط کرنے کے امور پر ان کے ساتھ تبادلہ خیال کیا۔ ڈاکٹر ہتھل حمود علطیبی نے کہا کہ یونیورسٹیوں کو ریسرچ پراجیکٹس کے ذریعے صنعتی شعبے کی پیداوار کو بہتر کرنے کیلئے اپنا کردار ادا کرنا چاہیے اور کہا کہ ان کی یونیورسٹی اس مقصد کیلئے جدید تحقیق پر توجہ دے رہی ہے۔ انہوں نے کہا کہ ٹیک سپارک جیسی نمائشیں طلبا کو صنعتی شعبے میں متعارف ہونے کے بہتر مواقع فراہم کرتی ہیں۔
انہوں نے کہا کہ ان کی یونیورسٹی چیمبر کے ساتھ مل کر جوائنٹ وینچرز شروع کرنے پر توجہ دے گی تاکہ اکیڈمیا اور انڈسٹری کے درمیان روابط مزید مضبوط ہوں۔اس موقع پر خطاب کرتے ہوئے انٹرنیشنل اسلامک یونیورسٹی کی فیکلٹی آف انجینئرنگ اینڈ ٹیکنالوجی کے ڈین پروفیسر ڈاکٹر ندیم احمد شیخ نے کہا کہ صنعتی شعبے کے مسائل حل کرنے میں تعاون کیلئے تیار ہیں۔ انہوں نے منتظمین کو ایسی شاندار نمائش کے انعقاد پر مبارکباد دی۔ انہوں نے طلبا کو اپنی صلاحیتوں اور عملی مہارتوں کو ظاہر کرنے کے لیے ایک پلیٹ فارم فراہم کرنے کی اہمیت پر زور دیا جس سے صنعتوں کو بھی باصلاحیت طلبا کو تلاش کرنے کے بہتر مواقع فراہم ہوں گے۔
نمائش نے طلبا کو اپنے اختراعی پراجیکٹس کا مظاہرہ کرنے اور ان کی پیشہ ورانہ ترقی کو فروغ دینے کے لیے ایک عمدہ پلیٹ فارم فراہم کیا گیا۔ یونیورسٹی کے ڈیپارٹمنٹ آف مکینیکل انجینئرنگ، ڈیپارٹمنٹ آف الیکٹریکل، کمپیوٹر انجینئرنگ اور ڈیپارٹمنٹ آف سول انجینئرنگ کے فائنل ایئر طلبا نے اپنے پروجیکٹس کی نمائش کی۔
