بھارت میں شوہر کو سابق اور موجودہ بیویوں نے ملکر قتل کردیا

پٹنہ (آئی پی ایس)بھارتی ریاست بہار میں سابق بیوی سلمیٰ اور موجودہ بیوی آمنہ نے مل کر اپنے شوہر عالمگیر انصاری کو چاقو کے وار کرکے قتل کردیا۔

بھارتی میڈیا کے مطابق ریاست بہار کے رہائشی 45 سالہ عالمگیر انصاری دہلی میں روزگار کی غرض سے مقیم تھا اور اس نے دو شادیاں کی ہوئی تھیں۔ پہلی بیوی کو طلاق دیدی تھی۔ وہ دہلی سے عید الاضحیٰ کی چھٹیوں پر بہار اپنے آبائی گھر آیا تھا۔

عالمگیر انصاری کی دونوں بیویاں بھی دہلی میں ہی ٹھہری تھیں لیکن عالمگیر کے بہار جانے پر وہ بھی پیچھے پیچھے چلی آئیں۔ آبائی گھر میں کسی بات پر تینوں کے درمیان تلخ کلامی ہوئی جس کے دوران بیویوں نے مل کر شوہر کو چاقو کے وار کرکے قتل کردیا۔

پولیس نے دونوں خواتین کو حراست میں لے لیا اور آلۂ قتل بھی ضبط کرلیا۔ قتل کے محرکات کا تعین نہیں ہوسکا۔ مزید تفتیش جاری ہے۔ پولیس پارٹی کو دہلی میں بھی تفتیش کے لئے بھیجا گیا ہے۔