میرپور (آئی پی ایس)بنگلہ دیش نے ٹیسٹ میچ میں افغانستان کو 546 رنز سے شکست دے دی۔ بنگلہ دیش کے شہر میرپور میں کھیلےگئے واحد ٹیسٹ میچ میں میزبان بنگلہ دیش کے 662 رنز کے تعاقب میں افغان ٹیم 115 رنز بنا کر آؤٹ ہوگئی۔
بنگلادیش کی ٹیم پہلی اننگز میں 382 بنا کر آؤٹ ہوئی تھی جس میں نجم الحسین 146 اور محمود الحسن 76 رنز بنا کر نمایاں رہے تھے۔مہمان ٹیم کی جانب سے نجات مسعود نے 5 اور یامین احمدزئی نے 2 وکٹیں حاصل کی تھیں۔382 رنز کے جواب میں افغان ٹیم اپنی پہلی اننگز میں صرف 146 رنز بناسکی تھی، افسر زازئی 36 اور ناصر جمال 35 رنز بنا کر نمایاں رہے تھے۔ بنگلہ دیش کی جانب سے عبادت حسین نے 4، تیج الاسلام، شریف الاسلام اور مہدی حسن نے 2،2 وکٹیں حاصل کیں۔
بنگلہ دیشنے اپنی دوسری اننگز میں نجم الحسین اور مومن الحق کی سنچریوں کی بدولت 425 رنز پر اننگز ڈیکلیئر کردی اور مہمان ٹیم کو جیت کے لیے 662 رنز کا ہدف دیا۔پہاڑ جیسے ہدف کے تعاقب میں افغان ٹیم میچ کے چوتھے دن 115 رنز پر ہی ڈھیر ہوگئی اور رحمت شاہ کے 30 رنز کی اننگز کے علاوہ کوئی افغان بلے باز زیادہ دیر تک وکٹ پر نہ ٹھہر سکا۔بنگلہ دیش کی جانب سے تسکین احمد نے 4 اور شریف الاسلام نے 3 شکار کئے۔بنگلہ دیشی بلے باز نجم الحسین کو دونوں اننگز میں سنچریاں سکور کرنے پر مین آف دی میچ کا ایوارڈ دیا گیا۔
