اسلام آباد(آئی پی ایس)ا لیکشن کمیشن نے 9 قومی اسمبلی کی نشستوں پر ضمنی انتخابات کے شیڈول کا اعلان کردیا ہے ۔
الیکشن کمیشن کا کہنا ہے کہ ضمنی انتخابات 16 مارچ کو ہوں گے، انتخابات کیلئے کاغذات نامزدگی 6 سے 8 فروری تک جمع کرائے جا سکتے ہیں ، کاغذات نامزدگی کی اسکروٹنی 13 فروری کو ہو گی۔ الیکشن کمیشن کے مطابق امیدواروں کی حتمی فہرست 22 فروری کو جاری کی جائے گی۔
ایک اور بیان میں الیکشن کمیشن آف پاکستان نے وضاحت کی ہے کہ گورنر خیبرپختونخوا کی جانب سے عام انتخابات کے لئے تاحال کوئی تاریخ نہیں دی گئی ہے۔
اپنے ایک بیان میں الیکشن کمیشن کا کہنا ہے کہ گورنر نے اپنے خط میں عام انتخابات کے انعقاد کے لئے سیاسی جماعتوں اور سکیورٹی اداروں سے مشاورت کرنے کی تجویز دی۔
خیال رہے کہ اس سے قبل ایک خبر سامنے آئی تھی جس میں بتایا گیا تھا کہ گورنر خیبرپختونخوا نے صوبے میں عام انتخابات کے لئے الیکشن کمیشن کو اپریل کی 16 تاریخ تجویز کی ہے۔
