اسلام آباد +دوحہ (آئی پی ایس)قرض پروگرام کی بحالی کے لئے آئی ایم ایف اور حکومت کے درمیان پالیسی مذاکرات (آج)بدھ کو دوحا میں ہونگے۔
حکومتی ذرائع کے مطابق پاکستان کی جانب سے مذاکرات کی قیادت وزیر خزانہ مفتاح اسماعیل کرینگے ان کے ہمراہ معاشی ٹیم بھی جائے گی ۔مزاکرات میں قرض کی اگلی قسط کی فراہمی سے متعلق تفصیلی بات چیت کی جائے گی۔
واضح رہے پی ٹی آئی حکومت نے آئی ایم ایف سے چھ ارب ڈالر قرض کے حصول کے لیے ایک پروگرام طے کیا تھا جس میں تین ارب ڈالر ملک کو وصول ہو چکے ہیں۔تاہم گذشتہ حکومت کی جانب سے تیل پر سبسڈی کے خاتمے اور تنخواہ دار طبقے پر مزید ٹیکس کے بارے میں واضح یقین دہانی نہ کرانے پر یہ پروگرام کچھ مہینوں سے تعطل کا شکار تھا۔آئی ایم ایف کی جانب سے پروگرام کی بحالی کے لیے کچھ شرائط رکھی گئی ہیں
جن میں ڈیزل و پیٹرول پر دی جانے والی سبسڈی کا خاتمہ، صنعتوں کے لیے ٹیکس ایمنسٹی سکیم کا خاتمہ، بجلی کے نرخوں میں اضافہ، ٹیکس وصولی کی شرح میں اضافہ اور مالیاتی خسارہ کم کر نا شامل ہیں۔یاد رہے کہ سابق وزیر اعظم عمران خان نے بجلی کے نرخ میں پانچ روپے فی یونٹ کمی کے ساتھ ساتھ پیٹرول و ڈیزل کی فی لیٹر قیمت میں دس، دس روپے کمی کرتے ہوئے قیمتوں کو اگلے مالی سال کے بجٹ تک منجمد کر دیا تھا۔
