مسقط ۔۔۔ مسقط میں پاکستانی سفارت خانے کا کہنا ہے کہ مسقط سے 260 میل جنوب مغرب میں واقع ابری میں ایک کان منہدم ہونے سے 7 پاکستانی جاں بحق اور 4 لاپتہ ہو گئے ہیں۔ بدھ کو جاری بیان میں کہا گیا ہے کہ ’(مسقط میں) سفارت خانہ تلاش اور بچاؤ کے آپریشن میں میزبان حکام کے ساتھ قریبی رابطے میں ہے۔ عمان کے حکام نے تلاش اور بچاؤ کے آپریشن کے لیے بھاری مشینری، جدید ترین کیمرے اور سراغ رساں کتوں کو جائے حادثہ پر پہنچا دیا ہے۔ ماہر ارضیات بھی امدادی کاموں میں تکنیکی مدد فراہم کر رہے ہیں۔ سائٹ پر کام روک دیا گیا ہے اور کمپنی نے تمام کارکنوں کو کھانا اور رہائش فراہم کی ہے جن میں سے 140 پاکستانی ہیں۔ حادثے میں ایک پاکستانی زخمی ہوا ہے جو اسپتال میں زیرعلاج ہے۔ بیان میں مزید کہا گیا ہے کہ سفارت خانے کے دو افسران نے ابری کا دورہ کیا اور متاثرہ خاندانوں اور کارکنوں سے ملاقات کی۔ سفارت خانے نے بھی مکمل تعاون کی پیشکش کی ہے اور لاشوں کی جلد از جلد وطن واپسی کی یقین دہانی کرائی ہے۔
