میاں چنوں میں گرنے والا میزائل ہمارا تھا، بھارت کا اعتراف

نئی دہلی(آئی پی ایس )تحصیل میاں چنوں میں گرنے والا میزائل بھارت کا تھا جس کی تصدیق بھارتی وزارت دفاع نے کر دی ہے۔
بھارتی خبر رساں ادارے اے این آئی کے مطابق بھارتی وزارت دفاع نے اپنے بیان میں کہا ہے کہ 9 مارچ 2022 کو معمول کی دیکھ بھال کے دوران ایک تکنیکی خرابی کی وجہ سے میزائل حادثاتی طور پر فائر ہوا۔ بھارتی حکومت نے سنجیدگی سے غور کیا ہے اور اعلیٰ سطحی کورٹ آف انکوائری کا حکم دیدیا ہے۔
بھارتی وزارت دفاع کے مطابق معلوم ہوا ہے میزائل پاکستان کے ایک علاقے میں گرا۔ واقعہ جہاں انتہائی افسوسناک ہے، وہیں یہ بھی راحت کی بات ہے حادثے سے کوئی جانی نقصان نہیں ہوا۔
واضح رہے کہ میاں چنوں میں پندرہ پل کے قریب جنگی تربیتی طیارہ گر کر تباہ ہوگیا۔ ریسکیو 1122 اور قانون نافذ کرنے والے اداروں کی ٹیمیں موقع پر پہنچ گئی تھیں۔
گزشتہ روز پریس کانفرنس کرتے ہوئے ترجمان پاک فوج میجر جنرل بابر افتخار نے ایئر فورس کے افسر کے ہمراہ پریس کانفرنس کے دوران بتایا تھا کہ 9 مارچ کو 6 بج کر 33 منٹ پر بھارتی حدود سے ایک شے نے ملکی فضائی حدود کی خلاف ورزی کی۔
اسی دوران ایئر فورس کے افسر نے بھارتی فضائی حدود کی خلاف ورزی پر بریفنگ دیتے ہوئے بتایا کہ پاک فضائیہ نے اس مشکوک ’شے‘ کی مکمل نگرانی کی اور اسے گرایا۔