لاہور(آئی پی ایس)لالی ووڈ کی خوبرواداکارہ رابعہ کلثوم نے بھی پاکستانی اداکارہ ثنا جاویدکو آڑے ہاتھوں لے لیا۔اداکارہ رابعہ نے فوٹو اینڈ ویڈیو شیئرنگ ایپ انسٹاگرام پر ثنا جاوید کے لئے ایک اسٹوری شیئر کی۔انہوں نے اپنی اسٹوری میں میک اپ آرٹسٹ واجد خان کی پوسٹ شیئر کی جس میں انہوں نے کہا تھا کہ وہ بھی اس بات سے متفق ہیں کہ ثنا جاوید انڈسٹری کی بدتمیز اداکارہ ہیں۔رابعہ کلثوم نے اس پوسٹ کو شیئر کرتے ہوئے لکھا کہ اب کانپیں ٹانگنے کا وقت آگیا ہے۔
اداکارہ نے کہا کہ انڈسٹری کے بدتمیز لوگوں کے خلاف آواز اٹھانے والوں کو دیکھ کر بہت خوشی ہورہی ہے، مجھے ان لوگوں کے درمیان یہ اتحاد پسند ہے۔واضح رہے کہ اداکارہ ثنا جاوید کے نامناسب رویے سے متعلق سوشل میڈیا پر اس وقت شوبز انڈسٹری کے دیگر فنکاروں کی جانب سے کی جانے والی متعدد پوسٹس وائرل ہیں۔حال ہی میں پاکستانی فیشن انڈسٹری سے تعلق رکھنے والی ماڈل فریحہ شیخ کی جانب سے ثنا جاوید کے خلاف اپنے انسٹا گرام اکاونٹ پر 4 صفحات پر مشتمل ایک طویل نوٹ لکھا گیا تھا جس کے بعد ثنا کے منفی رویے کے خلاف پوسٹس کا انبار لگ گیا ہے۔
ماڈل فریحہ شیخ نے ثنا جاوید کے منفی رویے اور ان کے ساتھ کام کرنے کے دوران برے تجربے سے متعلق اپنی پوسٹ پر تفصیل سے بات کی۔فریحہ شیخ کا اپنی پوسٹ میں ثنا جاوید کو غیر سنجیدہ قرار دیتے ہوئے کہنا تھا کہ بہت سارے فنکاوں کی جانب سے ثنا جاوید کے برے اور منفی رویے پر بات کرنے کے بعد وہ بھی اپنے برے تجربے پر بات کرنا چاہتی ہیں، وہ محسوس کر رہی ہیں کہ وہ اکیلی ثنا جاوید کے خراب رویے کا شکار نہیں ہوئیں بلکہ ان کے جیسے اور بھی بہت سے لوگ ہیں۔فریحہ شیخ نے اپنے ساتھ پیش آنے والے واقعے سے متعلق بات کرتے ہوئے بتایا تھا کہ ثنا جاوید اپنے سامنے کسی اور فنکار کو دیکھنا بھی پسند نہیں کرتیں اور انہیں خصوصی پروٹوکول کی ضرورت ہوتی ہے اور وہ دوسروں کو حقارت کی نظر سے دیکھتی ہیں۔
