وزیراعظم کے معاونِ خصوصی برائے امورِ سی ڈی اے اور ریجنل صدر پاکستان تحریک انصاف اسلام آباد علی نواز اعوان نے کہا ہے کہ اپنے لیڈر کی پکار پر لبیک کہنے کے لیے اسلام آباد پوری طرح تیار ہے، جب بھی قائد کا حکم ہوگا ہم ڈی چوک اسلام آباد کی تاریخ کا سب سے بڑا جلسہ کرکے ثابت کریں گے کہ ہم عمران خان کے ساتھ کھڑے ہیں
انہوں نے کہا کہ یہ جلسہ عدم اعتماد ہوگا چوروں ڈاکوؤں اورمنی لانڈرنگ کرنے والوں کے خلاف، عوام کا جم غفیر اپنے اس لیڈر پر اعتماد کا اظہار کرے گا جس نے آزاد خارجہ پالیسی کی بنیاد رکھی جس کو دنیا اس کے ویژن، ایمانداری اور امن پسندی کی وجہ سے جانتی ہے جو دنیا میں پاکستان کی مثبت شناخت کی علامت ہے انہوں نے کہا کہ بہت سی سیاسی جماعتیں ڈی چوک اسلام آباد میں جلسے کرتی ہیں لیکن انشاءاللہ پاکستان تحریک انصاف کا اجتماع سب سے منفرد اور تاریخ ساز ہوگا
