لاہور(آئی پی ایس )پاکستان کے نامور اداکار مسعود اختر کینسرجیسے موذی مرض سے لڑتے لڑتے زندگی کی بازی ہار گئے۔
خاندانی ذرائع کے مطابق مسعود اختر طبیعت ناسازی کے باعث گذشتہ 36 روز سے لاہور کے نجی اسپتال میں زیر علاج تھے، کچھ عرصہ قبل انہیں پھیپھڑوں کے کینسر کی تشخیص ہوئی تھی تاہم آج وہ دوران علاج اپنے خالق حقیقی سے جاملے۔
ایگزیکٹوڈائریکٹر الحمرا کے مطابق اداکار مسعود اختر لاہور کے نجی اسپتال میں زیرعلاج تھے ،ایگزیکٹوڈائریکٹر الحمرا ذوالفقار علی زلفی نے کہا کہ مسعود اختر کی الحمراکے لیے خدمات مثالی تھیں،مسعود اختر نے زندگی بھر فن کی خدمت کی،مشفق انسان تھے۔
پاکستان کے نامور اداکار مسعود اختر 5ستمبر 1940 کو ساہیوال میں پیدا ہوئے ۔ 60کی دہائی میں انہوں نے اپنے فنی کیرئیر کا آغاز کیا اور جلد ہی سٹیج کے مشہور اداکاروں میں شمار ہونے لگے ۔حکومت پاکستان نے انہیں 14 اگست 2005 کو صدارتی تمغہ برائے حسن کارکردگی عطا کیا تھا۔
