استنبول (آئی پی ایس )دنیا بھر میں مشہور ہونے والی ترک سیریز ارطغرل غازی میں مرکزی کردار ادا کرنے والے معروف اداکار انگین التان نے یوکرین کی موجودہ صورتحال کو مدِ نظر رکھتے ہوئے امن کا پیغام جاری کر دیا ہے۔
روس یوکرین کشیدگی پر جہاں دنیا بھر کے سماجی و سیاسی شخصیات کی جانب سے امن کے پیغام جاری کئے جا رہے ہیں وہیں اب فنکاروں نے بھی آواز بلند کرنا شروع کر دی ہے۔
ترک کی مشہور سیریز ارتغرل غازی کا مرکزی کردار ادا کرنے والے انگین التان بھی اس حوالے سے میدان میں آئے ہیں اور امن کا پیغام جاری کیا ہے۔
انسٹا گرام پر ترک اداکار انگین التان دوزیتان نے اپنی اسٹوری پر لکھا کہ جنگ نہیں امن، تباہی نہیں تخلیقی صلاحیت، نفرت نہیں ہمدردی، لالچ نہیں سخاوت، صرف ہمارے لیے نہیں بلکہ دنیا میں سب کے لیے۔
یاد رہے کہ اس سے قبل ہالی ووڈ اداکارہ انجلینا جولی نے بھی کہا تھا کہ وہ یوکرین کی موجودہ صورتحال اور وہاں کے شہریوں کی مدد کے لئے ہر ممکن کوشش کرنا چاہتی ہیں۔واضح رہے کہ گزشتہ دنوں روس نے یوکرین پر حملہ کر دیا، جس کے نتیجے میں متعدد افراد کے ہلاک و زخمی ہونے کی اطلاعات ملی ہیں جس پر دنیا بھر کے تمام ممالک تشویش کا اظہار کر رہے ہیں۔
