موٹر وے ایم ون پر پشاور ٹول پلازہ اور چارسدہ انٹرچینج کے قریب حفاظتی باڑ کاٹتے ہوئے تین مختلف وارداتوں میں ملوث مختلف ملزمان کو پکڑا گیا ہے۔ موٹروے پولیس کے ترجمان کے مطابق تین مختلف وارداتوں میں جب پٹرولنگ افسران اپنی گاڑی میں گشت پر تھے تو انہوں نے ملزمان کو پکڑ کر حراست میں لیا۔ چارسدہ انٹرچینج کے پاس ملزم رات کی تاریکی کا فائدہ اٹھاتے ہوئے حفاظتی باڑ کاٹ کر چنگ چی رکشہ میں لوڈ کررہا تھا۔ موٹروے پولیس کو دیکھ کر ملزم کھیتوں میں بھاگنے لگا جس کو موٹروے پولیس کے اہلکاروں نے تعاقب کرکے پکڑلیا۔ ایک دوسرے واقعے میں چارسدہ انٹرچینج کے پاس ہی موجود ایک شخص درختوں کی آڑ کا فائدہ اٹھا کر حفاظتی باڑ کاٹ رہا تھا کہ موقع پر دبوچ کر زیرحراست لیا گیا۔ دونوں واقعات میں ملوث افراد کو بعد از ضروری قانونی کارروائی تھانہ پڑانگ چارسدہ کے حوالے کیا گیا۔ اسی طرح کے ایک اور واقع میں پشاور ٹال پلازہ کے قریب ملزمان، جو کہ لپیٹی ہوئی حفاظتی باڑ اٹھا کر لے جا رہے تھے، کو موٹروے پولیس نے سروس روڈ پر پکڑ کر حراست میں لیا اور بعد از ضروری قانونی کارروائی تھانہ چمکنی پولیس پشاور کے حوالے کیا۔ موٹروے پر حفاظتی باڑ کی چوری موٹروے پولیس کے لیے ایک چیلنج بن چکی ہے۔ باڑ کے نا ہونے سے موٹروے پر سفر غیر محفوظ بن جاتا ہے جس کے تدارک کیلئے موٹروے پولیس موثر انداز میں کارروائی کر رہی ہے۔
