الخدمت فاؤنڈیشن کی جانب سے زلزلہ متاثرین میں امداد تقسیم

گلگت ۔۔۔۔۔ الخدمت فاؤنڈیشن نے روندو بلتستان کے متاثرین زلزلہ کے تقریباً 300 گھرانوں میں امدادی سامان تقسیم کیا۔ گذشتہ دنوں بلتستان ریجن کے تحصیل روندو میں آنے والے اندوہناک زلزلے میں درجنوں گاؤں کے سینکڑوں گھرانے متاثر ہوئے تھے ۔ نائب صدر الخدمت فاؤنڈیشن گلگت شیرعلی کی قیادت میں ریجنل ٹیم ، جی بی آرایس پی بلتستان ریجن ہیڈ حسین  کے ہمراہ روندو کے زلزلے سے متاثرہ  گاؤں گنجی اور سبسر کے تقریباً 300 گھرانوں میں لاکھوں مالیت کے امدادی سامان ، جن میں ٹینٹ ، ترپال ، کمبل اور ونٹر پیکیج شامل ہیں ، تقسیم کیا گیا ۔ واضح رہے کہ الخدمت فاؤنڈیشن نے  روندو انتظامیہ سے مشاورت اور گلگت بلتستان رورل سپورٹ پروگرام کے تعاون سے زلزلہ زدگان میں امدادی اشیاء تقسیم کیں۔ روندو کے عمائدین باالخصوص شیخ ہاشم اور شیخ بشیر نے الخدمت فاؤنڈیشن کے خدمات کو سراہتے ہوئے خراج تحسین پیش کیا ۔ انھوں نے کہا کہ الخدمت فاؤنڈیشن نے دورافتادہ اور زلزلے سے متاثرہ علاقوں میں امدادی سامان تقسیم کرکے متاثرین کی دلجوئی کی جس سے متاثرین کی حوصلہ افزائی ہوئی ۔ نائب صدر الخدمت فاؤنڈیشن گلگت بلتستان شیرعلی نے متاثرین زلزلہ سے بات چیت کرتے ہوئے کہا کہ الخدمت فاؤنڈیشن بلا رنگ ونسل و مسلک معاشرے کے پسماندہ ، مستحقین ، نادار ، یتم ، بیواؤں ، خصوصی افراد اور خواتین کے فلاح وبہبود کیلئے سرگرم عمل ہے ۔ انھوں نے متاثرین کو مزید امدادی سامان بہم پہنچانے کی یقین دہائی کرائی۔