
اسلام آباد،وفاقی وزیر اطلاعات و نشریات چوہدری فواد حسین نے کہا ہے کہ شہباز شریف عادی شعبدہ باز ہیں، انہیں حادثات پر سیاست یا شعبدہ بازی کے سوا کچھ نہیں آتا، تیس تیس سال حکومت کر کے بھی یہ لیڈر نہیں بن سکے، آج کا ”پیبلو ایسکوبار“ ہمیں بتا رہا ہے کہ نیرو سو رہا تھا، انہوں نے پنجاب اور مری میں وسائل خرچ کئے ہوتے تو آج ہمیں یہ دن نہ دیکھنا پڑتا، شریف فیملی نے صرف اپنے محلات کھڑے کئے، ان کے دور میں ہونے والی ترقی ان کے گھروں تک محدود تھی، تحریک انصاف کے سوا مری ریسکیو آپریشن میں کوئی دوسری جماعت موجود نہیں تھی، ہم نے نیا پاکستان کا وعدہ کیا ہے، ان شاءاللہ عمران خان کی قیادت میں ہم نیا پاکستان بنا کر رہیں گے۔ ان خیالات کا اظہار انہوں نے پیر کو قومی اسمبلی میں اظہار خیال کرتے ہوئے کیا۔
وفاقی وزیر اطلاعات نے کہا کہ توقع تھی کہ شہباز شریف ایک لیڈر کی طرح بات کریں گے لیکن یہ عادی شعبدہ باز ہیں، انہیں حادثات پر سیاست اور شعبدہ بازی کے سوا کچھ نہیں آتا، انہوں نے 30، 30 سال حکومت کی لیکن پھر بھی یہ لیڈر نہیں بن سکے، تیس سال انہوں نے بونے پالے جو بڑے نہیں ہو سکے۔ چوہدری فواد حسین نے کہا کہ مری واقعہ پر ہر آنکھ اشک بار ہے، مری میں 64 ہزار گاڑیاں پانچ دن میں داخل ہوئیں۔ ہمیں فخر ہے کہ وزیراعلیٰ پنجاب، وفاقی وزرائ، پاکستان تحریک انصاف کے ایم این ایز اور ایم پی ایز سمیت ہمارے ورکرز مری میں عوام کے ساتھ کھڑے تھے۔ سول انتظامیہ، پاک فوج اور سول اداروں نے مری میں ریسکیو آپریشن کر کے لاکھوں لوگوں کو نکالا۔ انہوں نے کہا کہ سابق وزیراعظم شاہد خاقان عباسی اور ن لیگ کا کوئی بندہ مری میں نظر نہیں آیا، انہوں نے وہاں جانے کی زحمت بھی گوارا نہیں کی۔ انہوں نے کہا کہ چوبیس گھنٹوں کے اندر ریسکیو آپریشن کر کے تمام سڑکیں کلیئر کر دی گئیں۔ چوہدری فواد حسین نے کہا کہ شہباز شریف جب وزیراعلیٰ تھے تو ہر روز نیا واقعہ رونما ہوتا تھا، ان کے دور میں ہسپتال میں آکسیجن نہ ہونے کی وجہ سے 100 بچے ہلاک ہو گئے تھے اور یہ منہ دیکھ رہے تھے۔ انہوں نے کہا کہ ماڈل ٹائون کا واقعہ رونما ہوا، معصوم لوگوں پر گولیاں برسائی جا رہی تھیں اور شہباز شریف کا کہنا تھا کہ انہیں روکنا میرا کام نہیں۔ وفاقی وزیر اطلاعات نے کہا کہ شریف فیملی نے صرف اپنے محلات کھڑے کئے، ان کے دور میں ہونے والی ترقی ان کے گھروں تک محدود تھی۔ انہوں نے کہا کہ پاکستان تحریک انصاف کی حکومت نے تین سالوں میں 13 نئے ریزارٹس بنائے، وزیراعظم عمران خان نے بلین ٹری سونامی پروگرام کا آغاز کیا، ملک میں سیاحت کو فروغ دیا۔ انہوں نے کہا کہ آج پاکستان میں سیاحت کے شعبہ میں انقلاب برپا ہو چکا ہے اور یہ ہمیں سبق دے رہے ہیں کہ ہمیں کیا کرنا چاہئے تھا۔ چوہدری فواد حسین نے کہا کہ ملک میں اندرونی سیاحت کی ایک نئی حقیقت نے جنم لیا ہے، آج الحمد للہ لاکھوں لوگ اندرون ملک سیاحت سے مستفید ہو رہے ہیں۔ انہوں نے کہا کہ ہمیں ایسے انتظامی اسٹرکچر کی ضرورت ہے جو بڑی آبادی کی ضروریات کو پورا کر سکے۔ چوہدری فواد حسین نے کہا کہ ہم نے نیا پاکستان کا وعدہ کیا ہے، وزیراعظم عمران خان کی قیادت میں ہم نیا پاکستان بنا کر رہیں گے۔ انہوں نے کہا کہ معیشت، انتظامی، سیاحت سمیت ہر شعبے میں ان لوگوں کے بوئے ہوئے کانٹے ہم صاف کر رہے ہیں، اپوزیشن آئندہ سات سال بھی روتی رہے گی، ان کا کام رونا ہے۔ ان شاءاللہ عمران خان کی قیادت میں پاکستان ترقی کی منازل طے کرے گا۔