اسلام آباد(آئی پی ایس ) سی ڈی اے کی انتظامیہ کی ہدایت پر شعبہ انفورسمنٹ نے پیر کے روز اسلام آباد کے مختلف علاقوں میں ضلعی انتظامیہ اور اسلام آباد پولیس کی معاونت سے تجاوزات اور غیر قانونی تعمیرات کے خاتمے کے لئے متعدد کارروائیاں کیں جسمیں متعدد غیر قانونی تعمیرات اور تجاوزات بھاری مشینری کی مدد سے مسمار کردی گئیں اور سرکاری اراضی پر قبضے کی کوشش ناکام بناتے ہوئے 5 کنال سرکاری اراضی واگزار کرالی گئی ۔تفصیلات کے مطابق ان کارروائیوں کا آغاز اسلام آباد کے سیکٹر F-11/4 میں واقع بھیکہ سیداں سے کیا گیا جہاں سرکاری اراضی پر قبضے کی کوشش کو ناکام بناتے ہوئے 4 غیر قانونی کمرے، 5 چار دیواریاں، 2 ہوٹل، 1 دکان، 1 کباڑ خانہ اور 1 غیر قانونی شیٹرنگ کے ٹھئیے کو بھاری مشینری کی مدد سے مسمار کردیا گیا اور سرکاری اراضی واگزار کرالی گئی۔مزیدبرآں اسلام آباد کے سیکٹر F-7/4 میں ایک رہائشی گھر کے باہر مالک مکان نے پلاٹ لائن سے تجاوز کرکے پانچ کنال سے زائد سرکاری اراضی پر غیر قانونی چار دیواری قائم کر رکھی تھی جس پر شعبہ انفورسمنٹ نے بروقت کارروائی کرتے ہوئے بھاری مشینری کی مدد سے غیرقانونی چار دیواری کو مسمار کردیا اور پانچ کنال سرکاری اراضی واگزار کرالی گئی۔ اس موقع پر سی ڈی اے انتظامیہ کا کہنا تھا کہ سرکاری اراضی کا تحفظ ہماری اولین ترجیح ہے اور قبضہ مافیا سے کوئی رعایت نہیں برتی جائے گی اور ان اقدامات کا مقصد اسلام آباد کو غیرقانونی تعمیرات اور تجاوزات سے پاک رکھنا ہے ۔واضح رہے کہ گزشتہ کئی ماہ سے وفاقی دارالحکومت میں سی ڈی اے تجاوزات اور غیر قانونی تعمیرات کے خلاف مسلسل آپریشن کرنے میں مصروف ہے جس سے اربوں روپے کی سرکاری اراضی واگزار کرائی جاچکی ہے۔
