گلگت(نمائندہ خصوصی)صوبائی وزیر اطلاعات،منصوبہ بندی و ترقی فتح اللہ خان نے کہا ہے کہ سابقہ ادوارمیں گلیشئرزپرریسرچ ٹھیک طرح نہیں ہوئی۔ گلگت بلتستان کے گلیشیئرز ہمارا سب سے بڑا سرمایہ ہیں، جس کا تحفظ ہماری اولین ذمہ داری ہے۔ ان خیالات کا اظہار انہوں نے قراقرم انٹرنیشنل یونیورسٹی میں گلیشیئولوجی سنٹر کے افتتاحی تقریب سے خطاب کرتے ہوئے کیا۔ صوبائی وزیر نے اس موقع پر مزید کہا کہ وزیراعظم پاکستان نے موسمیاتی تبدیلیوں کے مسائل کو پوری دنیا تک پھیلایا اور اس پر قابو کرنے کے لئے وزیر اعظم عمران خان کے اقدامات کو پوری دنیا نے بھی سراہا ہے۔ وقت کے ساتھ ٹریفک اور آلودگی بڑھ رہی ہے۔ موسم بھی تبدیل ہورہا ہے۔ اس سینٹرسے ریسرچ میں مدد ملے گی۔ کے آئی یو کے طلبہ اس سنٹر سے استفادہ حاصل کریں گے۔ سٹڈی کرنے کے لئے تمام سہولیات دستیاب ہیں۔ انہوں نے مزید کہا کہ پہلے گلیشیئرز پر بات نہیں ہو رہی تھی، آج بات ہو رہی ہے۔ ڈیٹا ہونا لازمی ہے۔ طلباء ہمارا سرمایہ ہیں۔ جب تک زندہ ہے سیکھنے کا سلسلہ جاری رہتا ہے۔ کے آئی یو کامیابی کے سفر پر گامزن ہے۔ حکومت گلگت بلتستان اس شعبے کی ترقی کے لئے بھر پور تعاون کرے گی۔ ان کا کہنا تھا کہ یونیورسٹی میں گلیشیئولوجی سنٹرکا قیام عمل میں لانے کا مقصد گلگت بلتستان میں موجود گلیشئرز کی حفاظت، اس سے بہتر استفادہ اور اس کی تیزی سے پگھلاؤ کے نقصانات کے سدباب کے حوالے سے پالیسیز مرتب کرنے میں مددگار ثابت ہوگا۔اس سے گلگت بلتستان کے طلباء کو گلیشیرز پر تجربات میں بھرپور معاونت بھی ملے گی۔ ہمارے نوجوان کسی میدان پیچھے نہیں ہیں لیکن وسائل کی فراہمی نہ ہونے کی وجہ سے ہمارے طلباء و طالبات پیچھے رہ جاتے تھے۔ گلگت بلتستان میں گلیشیولوجی سنٹر کا قیام نیک شگون ہے۔گلیشیرز کے تیزی سے پگھلنے کی وجوہات کوتلاش کرنا وقت کہ اہم ضرورت ہے جس کے لئے، اس سنٹر کے ذریعے ڈیٹا اکھٹا کرنے میں آسانی پیدا ہوگی۔ جامعہ قراقرم نے بہت تیزی سے ملکی تعلیمی اداروں میں اپنا مقام پیدا کیا۔خطے میں تعلیم کی فراہمی سمیت خطے کے دیگر مسائل کا حل بھی جامعہ ممکن بنا رہی ہے اور مسائل کی نشاندہی کے ذریعے حکومت کی معاونت بھی کر رہی ہے۔ گلیشیولوجی سنٹر کو مزید فعال بنانے کے حوالے سے جامعہ قراقرم کو صوبائی حکومت کو جہاں مدد درکار ہوگی حکومت کی بھرپور مدد کرے گی ۔
