اسلام آباد، حکومت نے ہارس ٹریڈنگ کی روک تھام کیلئے قانون سازی کا فیصلہ کرلیا ہے جبکہ سیالکوٹ واقعے پر سینیٹ اور قومی اسمبلی میں بحث کرانے کا فیصلہ بھی کیا ہے جس کیلئے20دسمبر کو سینیٹ اور 22دسمبر کو قومی اسمبلی کے اجلاس طلب کر لئے گئے ہیں۔ مشیر برائے پارلیمانی امور ڈاکٹر بابر اعوان نے کہا ہے کہ ووٹوں کی خرید و فروخت ختم کرنے کیلئے قانون سازی کی کابینہ سے منظوری لی جائے گی، وزارت پارلیمانی امور اور الیکشن کمیشن آپس میں رابطے میں ہیں اور الیکشن کمیشن سے مشاورت کے ساتھ یہ قانون سازی کرنے جا رہے ہیں، وزیراعظم عمران خان کی ہدایت پر دونوں ایوانوں میں سانحہ سیالکوٹ پر بحث کروائی جائے گی۔
تفصیلات کے مطابق حکومت نے سینیٹ میں ووٹوں کی خرید و فروخت (ہارس ٹریڈنگ)ختم کرنے کیلئے قانون سازی کا فیصلہ کیا ہے۔میڈیا سے گفتگو کرتے ہوئے مشیر برائے پارلیمانی امور ڈاکٹر بابر اعوان نے کہا ہے کہ ووٹوں کی خرید و فروخت ختم کرنے کے لئے قانون سازی کی کابینہ سے منظوری لی جائے گی، صدر مملکت نے ریفرنس کے ذریعے سپریم کورٹ سے رائے مانگی تھی، سپریم کورٹ نے اس پر اپنی رائے دی اور حکم جاری کیا کہ ووٹ کے اوپر سے پردا اٹھایا جا سکتا ہے۔بابراعوان نے کہا کہ ضرورت پڑنے پر دیکھا جا سکتا ہے کہ ووٹ جس پارٹی کو پڑنا چاہئے تھا اسی کو پڑا ہے یا نہیں، وزارت پارلیمانی امور اور الیکشن کمیشن آپس میں رابطے میں ہیں اور الیکشن کمیشن سے مشاورت کے ساتھ یہ قانون سازی کرنے جا رہے ہیں۔دوسری جانب حکومت نے سیالکوٹ واقعے کے بعد سینیٹ اور قومی اسمبلی میں بحث کرانے کا فیصلہ کیا ہے ، جس کیلئے قومی اسمبلی اور سینیٹ کے اہم اجلاس طلب کیے گئے ہیں۔ 20دسمبر کو سینیٹ اور 22دسمبر کو قومی اسمبلی کا اجلاس طلب کر لیا گیا ہے۔وزیراعظم عمران خان کے مشیر برائے پارلیمانی امور ڈاکٹر بابر اعوان نے چیئر مین سینیٹ صادق سنجرانی سے مشاورت کر لی ہے۔مشیر برائے پارلیمانی امور ڈاکٹر بابر اعوان نے کہا کہ وزیراعظم عمران خان کی ہدایت پر دونوں ایوانوں میں سانحہ سیالکوٹ پر بحث کروائی جائے گی۔
