اسلام آباد،مسلم لیگ (ن) کے سینئر رہنما وسابق وزیراعظم شاہد خاقان عباسی نے کہا ہے کہ ہمیں زرداری صاحب کے ڈٹ کرمقابلہ کرنے سے کوئی خطرہ نہیں۔ میڈیا سے گفتگو کرتے ہوئے کہاکہ انہوں نے کہا کہ نیب ترمیمی آرڈیننس کے تحت حکومت نے اپنے آپ کواین آراودیا ، ایسے احتساب کامقصد صرف عمران خان کی چوریوں کوبچانا ہے۔شاہد خاقان عباسی نے کہا کہ چیئرمین نیب ڈیلی ویجزپر ہیں، فیصلے نہیں کرسکتے، پارلیمنٹ کے مشترکہ اجلا س میں فون کرواکے لوگوں کوبلایا گیا۔سابق وزیراعظم نے کہاکہ ملک میں امن و امان کے حالات سب کے سامنے ہیں ،عوام مہنگائی معیشت کی تباہی کی صورت میں قیمت ادا کررہے ہیں۔شاہدخاقان نے کہاکہ ملک میں آئین کے مطابق نظام نہ ہو تو ترقی نہیں ہوسکتی ،استعفے اورعدم اعتماد کا آپشن موجود ہے،وقت پراستعمال ہونگے۔مسلم لیگی رہنما نے کہاکہ پی ڈی ایم کا مقصد ملک کے نظام کو بدلنا ہے، آئینی نظام میں مداخلت ختم نہیں ہوگی ملک نہیں چل سکتا ، 2 آرڈیننس جاری ہوئے،عدالت نے قانون کے اطلاق کا فیصلہ کرنا ہے۔شاہد خاقان عباسی نے مزید کہاکہ چیئرمین نیب بتادیں ہم نے کیاجرم کیا،سزائیں بھگتنے کوتیار ہیں جھوٹے کیسز کا جواب چیئرمین نیب کو دینا پڑیگا۔
