اسلام آباد،سری لنکن ہائی کمشنر موہن وجے وکرما نے کہا ہے کہ پریانتھا کمارا کے قتل کے حوالے سے حکومت پاکستان کے اقدامات سے خوش ہیں اور یقین دلاتا ہوں کہ اس واقعے سے دونوں ممالک کے تعلقات متاثر نہیں ہوں گے۔
سری لنکن ہائی کمشنر موہن وجے وکرما کا میڈیا سے گفتگوکرتے ہوئے کہنا تھا کہ ہمارے ایک شہری کا قتل ہوا جو انتہائی افسوسناک ہے لیکن سری لنکن حکومت کو یقین ہے کہ اس کا تعلق پاکستان سری لنکا تعلقات سے نہیں ہے۔انہوں نے کہا کہ ہم نے دیکھا کہ پاکستان نے فوری ایکشن لیا، بڑی تعداد میں لوگوں کو گرفتار کیا گیا، ہمیں کہنے کی ضرورت نہیں کہ ہم دوست ہیں۔موہن وجے وکرما کا کہنا تھا آج شہری پریانتھا کی میت واپس بھیج دی ہے، ہم پاکستان کی حکومت کی طرف سے لیے گئے اقدامات سے خوش ہیں، یقین ہے حکومت پاکستان ایسے اقدامات کرے گی کہ متاثرہ فیملی کو انصاف ملے۔سری لنکن ہائی کمشنر کا کہنا تھا کہ پاکستان اور سری لنکا کے سماجی، دفاعی اور تجارتی تعلقات ہیں، میں یقین دلاتا ہوں کہ یہ واقعہ ہمارے تعلقات پر اثرانداز نہیں ہو گا، ہم دوست ہیں اور دوست رہیں گے۔ پی ٹی آئی قیادت نے سری لنکن ہائی کمیشن جاکر سیالکوٹ واقعہ پر اظہار تعزیت کیا۔ وفد کی قیادت جنرل ریٹائرڈ خالد نعیم لودھی نے کی۔ وفد نے کہا کہ سری لنکن مینجر کے قتل کا واقعہ انتہائی افسوسناک ہے، دکھ کا اظہار الفاظ میں ممکن نہیں، پوری قوم اس واقعے کی بھرپور مذمت کرتی ہے، پوری پاکستانی قوم سری لنکن منیجر کے قتل پر رنجیدہ ہے۔ پاکستان تحریک انصاف کے وفد نے سری لنکن حکام کو یقین دلایا کہ اس جرم میں شامل ہر ایک شخص کو انصاف کے کٹہرے میں لایا جائے گا اور ذمہ دران کو پاکستانی قانون کے مطابق سخت سے سخت سزا دی جائے گی۔سری لنکا کے ہائی کمشنر نے کہا کہ ملزمان کے خلاف پاکستان کی فوری کارروائی سے یقین ہے کہ متاثرہ خاندان کو انصاف ملے گا۔ پاکستان کے ساتھ ہمارے تعلقات بہترین رہے ہیں، ان پر کوئی آنچ نہیں آئے گی۔
