اسلام آباد،آرڈیننس کے ذریعے سرکاری تعلیمی اداروں کو میونسپل کارپویشن کے تحت کرنے کے معاملہ پر فیڈرل گورنمنٹ ایجوکیشن،جوائنٹ ایکشن کمیٹی نے ہڑتال جاری رکھتے ہوئے تعلیمی اداروں میں کل پیر سے شروع ہونے والے مڈ ٹرم امتحانات کا شیڈول معطل کرنے کا اعلان کر دیا، جوائنٹ ایکشن کمیٹی نے واضح کیا ہے کہ لوکل گورنمنٹ کے آرڈیننس سے شق 166 کی منسوخی تک ہڑتال جاری رہے گی۔
فیڈرل گورنمنٹ ایجوکیشن،جوائنٹ ایکشن کمیٹی کا اجلاس چیئرمین فضل مولی کی زیر صدارت ہوا۔اجلاس میں وائس چیئرمین منصور علی شاہ نے وزارت تعلیم کے حکام کے ساتھ ہونے والے مذاکرات اور ڈیڈ لاک پر بریفنگ دی، جوائنٹ ایکشن کمیٹی نے عہدیداروں کی جانب سے 100 فیصد اتفاق رائے سے یہ طے پایا کہ ہڑتال کا سلسلہ جاری رکھا جائے گا،تعلیمی اداروں میں کلاسز اور کام چھوڑ ہڑتال جاری رہے گی،جوائنٹ ایکشن کمیٹی نے طے کیا کہ اب مذاکرات با اختیار حکومتی سطح پر ہی کیے جائیں گے، مڈ ٹرم امتحانات کا شیڈول معطل کرنے کا فیصلہ کرتے ہوئے اعلان کیا گیا ہے کہ جب اسکولوں میں تعلیمی سلسلہ بحال کیا جائے گا تو دوبارہ شیڈول جاری کیا جائے گا، بچے پڑھائے گئے سلیبس کے مطابق گھروں پر تیاری جاری رکھیں گے۔جوائنٹ ایکشن کمیٹی نے اپنے اعلامیہ میں کہا ہے کہ پیر کو اداروں کے ہیڈ صاحبان کا اجلاس بلا کر والدین کو اعتماد میں لیں گے،ایکشن کمیٹی کی ذیلی کمیٹیاں آگاہی مہم جبکہ مرکزی کمیٹی روزانہ کی بنیاد پر 6 سیکٹروں کا دورہ جاری رکھے گی، ایکشن کمیٹی نے کہا ہے کہ جلد اجلاس بلا کر آئیندہ کا مکمل لائحہ عمل پیش کیا جائے گا۔
