اسلام آباد ، پارلیمانی سیکرٹری منصوبہ بندی و ترقی کنول شوزب نے کہا ہے کہ الیکشن چوری کرنا، ووٹ خریدنا، دھاندلی کرنا، جعلی ویڈیو ٹیپیں بنانا اور پھر اداروں پر دباوُ ڈالنا ن لیگ کا وطیرہ رہا ہے،پتہ نہیں انہیں ای وی ایم سے کیا گھبراہٹ ہے، پارلیمنٹ نے ای وی ایم کا قانون منظور کرلیا ہے اور آئندہ انتخابات ای وی ایم پر ہی ہوں گے، اپوزیشن اس سے گھبرانے کی بجائے الیکشن میں مقابلے کی تیاری کرے، ان کے پاس تو انتخابی امیدوار ہی پورے نہیں ہیں۔
بدھ کو تحریک انصاف کی رہنما کنول شوزب نے ترجمان ن لیگ مریم اورنگزیب کے بیان پر ردعمل دیتے ہوئے کہا کہ ای وی ایم کا استعمال درحقیقت بیلٹ پیپرز کے ذریعے ہونے والی دھاندلی روکنے کی کوشش ہے جو ن لیگ ہمیشہ کرتی آئی ہے، آج تک کوئی ایسا الیکشن نہیں جو ن لیگ نے دھاندلی سے نہ جیتا ہو،وزیراعظم عمران خان قوم کے لیڈر ہیں اور اپنے عوام کے درمیان موجود ہیں، قوم کا پیسہ نواز شریف نے لوٹا اور ملک سے مفروریت کی زندگی گذار رہے ہیں، قومی سلامتی کے حوالے سے بھی نواز شریف کا کردار مشکوک ہے، ملک سے محبت کرنے والا لیڈر عمران خان ہے جس نے اپنا سب کچھ اس ملک کیلئے وقف کر دیا ہے، آج ملکی معاشی مسائل سابقہ ادوار کی کرپشن اور لوٹ مار کی وجہ سے ہیں، ہم نے الیکشن چوری اور پیسہ چوری کے تمام راستے بند کر دیئے ہیں، انہیں اس پر تکلیف تو ہونی ہے۔
