پاکستان کرکٹ بورڈ (پی سی بی)کے میڈیکل پینل نے محمد رضوان اور شعیب ملک کو آسٹریلیا کے خلاف سیمی فائنل میچ کے لیے فٹ قرار دے دیا ہے۔تفصیلات کے مطابق آسٹریلیا کے خلاف سیمی فائنل سے قبل محمد رضوان اور شعیب مکمل صحتیاب ہوگئے ہیں۔قومی کرکٹ ٹیم ٹی ٹوئنٹی ورلڈکپ کے دوسرے سیمی فائنل میں آج آسٹریلیا کا مقابلہ کرے گی، ایونٹ میں اب تک ناقابل شکست رہنے والی پاکستانی ٹیم کے لیے گزشتہ روز بری خبر سامنے آئی تھی کہ وکٹ کیپر بیٹسمین محمد رضوان اور آل راونڈر شعیب ملک بخار میں مبتلا ہوگئے ہیں اور دونوں نے پریکٹس سیشن میں بھی حصہ نہیں لیا۔ذرائع کے مطابق وکٹ کیپر بیٹسمین محمد رضوان اور آل راونڈر شعیب ملک کا بخار اترگیا ہے جس کے بعد دونوں آسٹریلیا کے خلاف میچ میں شرکت کریں گے۔ دوسری جانب پی سی بی کا کہنا ہے کہ میڈیکل پینل محمد رضوان اور شعیب ملک کا جائزہ لے گا اور میچ سے پہلے دونوں کا فٹنس ٹیسٹ بھی ہوگا۔
