اسلام آباد،ریلیف پیکج کا اعلان ہوتے ہی مہنگائی بے قابو،ہفتہ وارشرح میں صفر اعشاریہ 67فیصد اضافہ ہونے کے بعد کم آمدنی والوں کیلئے مہنگائی کی شرح 16 اعشاریہ 43فیصد پر پہنچ گئی ۔
تفصیلات کے مطابق ادارہ شماریات کی مہنگائی کے حوالے سے ہفتہ وار رپورٹ جاری کردی۔ادارہ شماریات کے مطابق ملک میں حالیہ ہفتے کے دوران مہنگائی میں 0 اعشاریہ 67فیصد اضافہ ہوا جس کے بعد مہنگائی کی ہفتہ وارمجموعی شرح 15اعشاریہ 21 فیصد ہوگئی جبکہ کم آمدن والے افراد کیلئے مہنگائی کی شرح 16اعشاریہ 43فیصد پرپہنچ گئی۔ادارہ شماریات نے بتایا کہ ایک ہفتے میں 28 اشیا کی قیمتوں میں اضافہ ہوا، ٹماٹر اوسط 20 روپے 9 پیسے فی کلو، چینی اوسط 5 روپے 56 پیسے فی کلو مہنگی ہوئی جبکہ ایک ہفتے میں ایل پی جی کا سلنڈر 77 روپے 96 پیسے مہنگا ہوا۔ادارہ شماریات کے مطابق ایک ہفتے میں گھی کی فی کلو قیمت 10 روپے 21 پیسے بڑھی، انڈے 3 روپے 60 پیسے فی درجن اور آٹے کا 20 کلو کا تھیلا4 روپے 71 پیسے مہنگا ہوا۔ادارہ شماریات کا کہنا ہے کہ ایک ہفتے میں بیف کی قیمت میں اوسط 5 روپے34 پیسے کا اضافہ ہوا جبکہ آلو، مٹن، لہسن اورگڑ بھی مہنگا ہوا۔ادارہ شماریات کے مطابق ایک ہفتے میں 3 اشیا کی قیمتوں میں کمی ہوئی اور 20 اشیا کی قیمتوں میں استحکام رہا۔
