اسلام آباد(آئی پی ایس )حکو مت کا سمندر پار پاکستانیوں کو سہولیات فراہم کرنے کے لیے بڑا اقدام،وزیر اعظم نے وفاقی اداروں میں سہولت کار افسران مقرر کرنے کا حکم دیدیا۔وزیراعظم نے ہدایت کی کہ 39وفاقی ڈویژنز میں اوورسیز پاکستانیوں کیلئے سہولت کار افسر مقرر کیا جائے۔وزیراعظم آفس کی جانب سے جاری مراسلہ کے مطابق وزیراعظم عمران خان نے 13 وزارتوں کے 34 ذیلی اداروں میں خصوصی سیکشن اور ڈیسک قائم کرنے کا بھی حکم دیا۔وزیراعظم کی ہدایت پر وزیراعظم ڈلیوری یونٹ کی متعلقہ وزارتوں کو ہدایات جاری کی گئی۔مراسلہ کے مطابق سہولت کار افسران گریڈ 19سے کم نہیں ہوں گے،وزارتیں سہولت کار افسران کی تعیناتی کو نوٹیفائی کریں۔مراسلہ میں کہا گیا کہ مخصوص سیکشن اور ڈیسک کے قیام کا بھی باقاعدہ نوٹیفیکشن جاری کیاجائے ۔وفاقی ادارے سہولت کی فراہمی سے متعلق آگاہی کے لیے وزارت خارجہ، وزارت سمندر پار پاکستانی اور اطلاعات کو معلومات فراہم کریں۔بیان کے مطابق اقدام کا مقصد سمندر پار پاکستانیوں کو دفاتر میں درپیش مسائل کا ازالہ کرنا ہے۔تمام ڈویژنز 21 روز میں کاروائی مکمل کر کیرپورٹ دیں۔اقدام سے سمندر پار پاکستانیوں کے لئے خدمات کی فراہمی اور دیگرامور سے متعلق آگاہی میں معاونت میسر ہوگی۔وزارت خارجہ،اوورسیز پاکستانی اوراطلاعات و نشریات اپنے طور پر بھی سہولت کی آگاہی دیں۔
