صفائی پر کوئی سمجھوتہ نہیں ہوگا، وزیر علیٰ پنجاب

لاہور(آئی پی ایس )وزیر علیٰ پنجاب سردار عثمان بزدار نے کہا ہے کہ شہریوں کو صاف ستھرا ماحول دینا ہماری ذمہ داری ہے۔تفصیلات کے مطابق وزیر علیٰ پنجاب سردار عثمان بزدار نے ایک بار پھر بغیر پروٹوکول شہر لاہور کا دورہ کیا اور مختلف علاقوں میں صفائی کی صورتحال کا جائزہ لیا۔وزیراعلی عثمان بزدار اسٹاف افسر، سیکیورٹی آفیسر اور آفیشل فوٹوگرافر و کیمرہ مین کو بھی ساتھ لے کر نہ گئے۔وزیراعلی پنجاب نے فیروز پور روڈ، ٹاون شپ، جوہر ٹان، گارڈن ٹاون، فیصل ٹاون، کالج روڈ، اکبر چوک اور دیگر علاقوں میں صفائی کے انتظامات مشاہدہ کیا۔وزیر اعلیٰ پنجاب عثمان بزدار بعض علاقوں میں صفائی کی صورتحال بہتر نہ ہونے پر برہم ہوئے اور لاہور ویسٹ مینجمنٹ کمپنی کو صفائی کے انتظامات بہتر بنانے کا حکم دیا۔ عثمان بزدار نے کہا کہ صفائی کی صورتحال کے بارے میں کچھ عرصے سے شکایات مل رہی تھیں، میں نے صفائی انتظامات کا خود جائزہ لیا اور ایل ڈبلیو ایم سی کو صفائی کے انتظامات بہتر بنانے کی ہدایت بھی کی ہے۔وزیر اعلی پنجاب نے مزید کہا کہ صفائی پر کوئی سمجھوتہ نہیں ہوگا، صفائی کے پلان کی ڈیلی مانیٹرنگ کی جائے، متعلقہ حکام لاہور شہر کو صاف کرنے کے لئے کوئی کسر اٹھا نہ رکھیں، شہریوں کو صاف ستھرا ماحول دینا ہماری ذمہ داری ہے۔