اسلام آباد (آئی پی ایس )مصطفی پرائزسائنسی فضیلت کی بین الاقوامی علامت ہے۔ اس سال کے ایوارڈ کے لئے پاکستان کے پروفیسر ڈاکٹر محمد اقبال چودھری کو بائیو آرگینک کیمسٹری کے شعبے میں نامزد کیا گیا ہے۔مصطفی پرائز ، سائنس اور ٹیکنالوجی کا ایک اعلی ایوارڈ ہے۔ یہ ایوارڈ اسلامی دنیا سے تعلق رکھنے والے اعلی محققین اور سائنسدانوں کو چار شعبوں میں دیا جاتا ہے۔ مصطفی پرائز 2012 میں بین الاقوامی سطح پر سائنسی فضیلت کی علامت کے طور پر قائم کیا گیا تھا ، اور اسے مسلم دنیا کا نوبل پرائز سمجھا جاتا ہے۔پاکستان ، ایران ، بنگلہ دیش ، لبنان اور مراکش کے پانچ سائنسدانوں کو ان کے متعلقہ شعبوں میں اس سال مصطفی پرائز سے نوازا گیا ہے۔پروفیسر ڈاکٹر محمد اقبال چوہدری عالمی شہرت یافتہ دواں کے کیمیا دان ہیں۔ ڈاکٹر چوہدری بین الاقوامی جرائد میں نامیاتی اور بائیو آرگینک کیمسٹری کے شعبوں میں 1،175 تحقیقی مقالے ، 76 کتابیں اور 40 ابواب شائع کر چکے ہیں۔ وہ اب تک 40 امریکی پیٹنٹ بھی حاصل کر چکے ہیں۔ڈاکٹر چوہدری کے کام کو دنیا بھر کے محققین نے 27،407 مرتبہ نقل کیا ہے اور ان کا ایچ انڈیکس 70 ہے۔ اب تک 94 قومی اور بین الاقوامی اسکالرز نے ان کی نگرانی میں پی ایچ ڈی کی ڈگریاں مکمل کی ہیں۔اس سے پیشتر ڈاکٹر چوہدری کی سائنسی خدمات کے اعتراف میں انہیں پاکستان کی مختلف حکومتوں نے ہلال امتیاز ، ستارہ امتیاز ، اور تمغہ امتیاز سے نوازا ہے۔وہ دنیا کی مشہور سائنس اکیڈمیوں ، اکیڈمی آف سائنسز برائے ترقی پذیر دنیا ، اسلامک ورلڈ اکیڈمی آف سائنسز ، پاکستان اکیڈمی آف سائنسز ، رائل سوسائٹی آف کیمسٹری ، اور کیمیکل سوسائٹی آف پاکستان کے فیلو بھی ہیں۔پروفیسر چوہدری کو ایران کے صدر نے خوارزمی بین الاقوامی ایوارڈ ، آذربائیجان کے صدر نے ، تعلیم میں ای سی او ایوارڈ اور وزیر اعظم پاکستان نے کیمسٹری میں کامسٹیک ایوارڈ سے نواز رکھا ہے۔انہیں 2004 میں ہائر ایجوکیشن کمیشن کی طرف سے "ممتاز قومی پروفیسر” اور 2013 میں جامعہ کراچی کی طرف سے شاندار پروفیسر کا اعزاز دیا ہے۔اس وقت ڈاکٹر چوہدری پاکستان کے عالمی شہرت یافتہ بین الاقوامی سنٹر برائے کیمیا و حیاتیات ، کراچی یونیورسٹی میں بطور ڈائریکٹر اور کامسٹیک او ائی سی کی تنظیم برائے سائنسی ترقی کے کوآرڈینیٹر جنرل کے طور پر فرائض سر انجام دے رہے ہیں۔
